Oito concellos galegos impulsarán a implantación da Axenda 2030 no eido local a través dos obradoiros ‘Todos os ODS son locais’, facilitados polo Fondo Galego de Cooperación e Solidariedade a través do proxecto europeo ‘People & Planet’. A formación no Barco, un dos oito municipios galegos
seleccionados para este proxecto, terá lugar o 12 de marzo, de 10 a 14 horas, no Salón de Actos do Edificio Multiusos.
A actividade está dirixida a persoal político e técnico dos municipios, deputacións e mancomunidades, pero especialmente a asociacións de todo tipo e á xente nova, tanto de xeito individual como integrantes de colectivos de carácter social e cultural e de agrupacións de comerciantes, ANPAS, etc. O programa permitirá achegarse aos principios fundamentais da Axenda 2030 e ás fases do proceso de localización mediante exemplos de boas prácticas, ao tempo que se empregarán dinámicas participativas para explorar conxuntamente estratexias para territorializar os ODS, de xeito que xurdan iniciativas que despois poidan ser levadas á práctica. Neste senso, informarase das liñas de financiamento dispoñibles e facilitarase o asesoramento necesario.
Os asistentes recibirán mesmo unha guía de apoio, alén de degustar café de comercio xusto no descanso. O proxecto “People & Planet: un destino común” busca concienciar as mozas e mozos europeos sobre as graves consecuencias do cambio climático para que se convertan en axentes de transformación na procura dun mundo máis sustentable. A iniciativa, que botou a andar en novembro de 2020 e que se prolongará durante catro anos, reforza tamén aos gobernos municipais na promoción de políticas a prol do desenvolvemento sostible, tendo en conta a interdependencia local-global. Procúrase así contribuír a implantar a Axenda 2030. O plan está financiado polo programa DEAR da Comisión Europea e involucra a 17 entidades de Galicia, Portugal, Alemaña, Irlanda, Italia, Polonia, Romanía, Países Baixos e Cabo Verde.
Enlace para as inscricións:
https://docs.google.com/forms/d/e/1FAIpQLScZk0-T9jRqDASsYvvnWl8aIlfCNqz4k_bwbnLGewvhqb_3fQ/viewform
