Dentro das actividades complementarias da 41 edición da Feira do Viño de Chantada, que se celebraba a pasada fin de semana, incluíase o venres 15 de marzo unha novidosa proposta: a I edición do Work Ribeira Sacra. É o primeiro evento networking que se celebra no marco desta emblemática cita que exalta o viño das ribeiras de Chantada. A concelleira de turismo de Chantada, Pamela Fernández, inauguraba a xornada. O desenvolvemento do programa estaba conducido por Silvia Panadeiros de WorkEvents.
A iniciativa Work Ribeira Sacra estaba destinada, principalmente, a empresarios, autónomos e emprendedores que desenvolven os seus proxectos de vida na Ribeira Sacra. Daban a coñecer as súas experiencias Alexandra Seara, xerente do Consorcio de Turismo de Ribeira Sacra; Beatriz Pérez de Máis que Románico; Manuel Gallego, responsable da área de turismo cultural en Xeitura Patrimonio SCG, e Idoia Costa, investigadora especializada en cestaría.
Despois dos distintos relatorios, tiña lugar unha mesa redonda coa participación dos asistentes, onde se abordaban cuestións como a gastronomía, o patrimonio, os recursos e potencialidades do territorio Ribeira Sacra e como emprender ou desenvolver un negocio promocionando este tipo de valores.
O punto e final a esta primeira edición de Work Ribeira Sacra Chantada tivo lugar no Restaurante Pulpería Os Pendellos onde gozaban da gastronomía e dos viños locais.
