ConcellosÚltima hora

O labor asistencial de Cáritas do Barco, vital para moitas familias nesta emerxencia sanitaria

Esta entidade entregaba entre o 25 de marzo e o 6 de abril 3.890 quilos de alimentos a 49 familias

Estanterías do banco de alimentos de Cáritas Interparroquial do Barco./ Foto cedida.

 

Leite, azucre, aceite, cereais e cola-cao. Son os produtos que máis se necesitan no banco de alimentos de Cáritas Interparroquial do Barco, que nas últimas semanas está notando un considerable descenso nas súas reservas para poder atender ás necesidades das familias. “Atendemos a moitas familias con nenos e con alimentos como o leite cúbrense os almorzos e as ceas dos máis pequenos”, aclara Isabel Álvarez, traballadora social de Cáritas no Barco.

Esta entidade continúa mantendo o seu importante labor asistencial en Valdeorras nas últimas semanas, marcadas pola crise do coronavirus, nas que ademais viron incrementado o número de servizo realizados.

“Este ano coincidiunos ademais esta situación cun descenso nos alimentos reunidos durante a Operación Kilo que fixemos no Nadal, e iso sen dúbida, notámolo nas reservas de alimentos”, engade Isabel Álvarez.

 

Cadro da evolución dos quilos de alimentos recaudados nos últimos anos na Operación Kilo de Cáritas do Barco.

 

Hai máis familias que demandan esta axuda, en concreto, rexistraban entre o 16  de marzo e o 14 de abril  nove altas novas de familias, cun total de 23 membros. Tamén están atendendo a novas persoas que lles derivan dende os Servizos Sociais do Concello do Barco. Así, dende que se decretou o estado de alarma e ata o día de hoxe, 14 de abril, Cáritas Interparroquial do Barco leva prestado 216 servizos a 52 familias, o que representa un total de 186 persoas atendidas.

Soamente entre o 25 de marzo e o 6 de abril Cáritas do Barco, cuxo director é Julio Mourelo, repartía un total de 3.890 quilos de alimentos (do Fondo Social Europeo e recibidos dende o Banco de Alimentos de Ourense) a 49 familias. Unha distribución na que esta entidade benéfica agradece o apoio de Protección Civil do Barco, “que nos axudou e levoulle os alimentos ás familias, xa que a maior parte delas non tiñan forma de pasar polo pavillón vello, que era onde se facía a distribución dos alimentos”, matiza Cáritas.

Dende o inicio da emerxencia sanitaria Cáritas xa non realiza reparto de alimentos frescos, só dos non perecedoiros, se ben o Concello do Barco entrega vales para que as familias poidan adquirir os frescos.

Ademais de prestar asistencia no referente a alimentos de primeira necesidade, Cáritas atende “emerxencias puntuais que poidan ter as persoas”. Neste senso, preocúpalle a situación de cara ás vindeiras semanas, tendo en conta que, polo de agora, non se están cobrando recibos como o da luz. “Pensamos que máis adiante imos ter unha avalancha de emerxencias. O que si estamos facendo nestes momentos é asesorar ás familias no tema de recibos para que saiban como os poden fraccionar e afrontar de maneira máis adecuada os pagos”, sinala Isabel Álvarez.

Dende esta entidade benéfica agradécense as doazóns de alimentos que están recibindo e que consideran fundamentais para poder manter as reservas de alimentos; así como as doazóns económicas. Tamén animan á cidadanía a colaborar tendo en conta a difícil situación pola que están a pasar moitas familias nestes momentos.

Por outra banda, dende o inicio do estado de alarma Cáritas Interparroquial do Barco non está a recoller roupa, un servizo que prevén retomar cando se supere a situación de emerxencia sanitaria polo coronavirus.

Artigos relacionados

Back to top button