Xosé Manuel Merelles Remy tomaba posesión esta mañá como director da Axencia de Turismo de Galicia, nun acto presidido polo presidente da Xunta de Galicia, Alfonso Rueda, e no que tamén tomaban posesión dos seus cargos outros representantes do gobero galego, entre eles o novo delegado da Xunta en Ourense, Manuel Pardo. É a segunda vez que este valdeorrés asume este cargo, que xa ocupara entre xullo do 2023 e xaneiro deste ano 2024. O seu nomeamento aparecía publicado o 24 de abril no Diario Oficial de Galicia.
Nado na Rúa (Ourense), Merelles Remy é licenciado en Xornalismo pola Universidade Complutense de Madrid. Traballou en varios medios de comunicación ata chegar á Xunta de Galicia no ano 1991, onde foi redactor no gabinete de comunicación da Presidencia, así como xefe de prensa na Consellería de Xustiza, Interior e Relacións Laborais e en Sogama. Despois, ao longo de case 25 anos ocupaba a Xefatura da Área de Comunicación da Axencia de Turismo de Galicia.