Os rituais dunhas 40 mascaradas de inverno despregábanse na tarde deste sábado polas rúas de Viana do Bolo. Enmascarados, danzantes, bombos e aixadas, pero tamén cinza, lama, vexigas, tenaces ou mesmo cordas vestían de tradición as rúas desta vila no marco do VII Festival Internacional ViBoMask Mascarada Ibérica de Viana e Vilariño de Conso, que mañá recalará en Vilariño de Conso.
Co atroador son da Asociación Xuntos polo Fulión, e coas danzas dos seus Boteiros, cobraba vida, pasadas as catro e media da tarde, nas proximidades do Toural un intenso e espectacular desfile no que podían verse máscaras e tradicións de diferentes puntos da provincia de Ourense, entre eles dous fulións de Viana do Bolo, os fulións de Mormentelos (Vilariño de Conso) e da Mourela p’acá (Manzaneda), o de Buxán (O Bolo) ou o da Veiga, así como os Cigarróns de Verín, os Felos de Maceda, o Entroido de Laza, Galos de San Pedro da Mezquita (A Merca), Mázcaras da Xironda (Cualedro), Toro e Xigante de Celavente (O Bolo) e Vergalleiros de Sarreaus.
Ademais participaban Entroidos doutras partes de Galicia como o de Salcedo, coa figura do Oso (A Pobra do Brollón) e os seus criados, os Volantes e Maragatos do Entroido Ribeirao (Chantada), o Entroido de Samede (Paderne), os Xenerais da Ulla dacabalo e botando atranques, Madamas e Galáns de Cobres (Vilaboa), Merdeiros (Vigo) e Rancho e Cabaleiros de Entroido da Feira (Salceda de Caselas).
Así mesmo había mascaradas doutros puntos da península como os Sidros e Comedies (Valdesoto) de Asturias, tamén de Castela e León como os Mazcaraos e Madamas de Pombrirego (León) , o Antruejo de Carrizo de la Ribera (León), Talanqueiras e Visparrps (San Martín de Castañeda, Galende), os Diablos e Mazcaritas de Luzón (Guadalaxara), o Carnaval de Abanto e o Joaldunak do País Vasco ou, xa chegados dende o nordeste de Portugal, os Caretos de Lazarim. No desfile tamén participaban os Mamuthones e Issohadores de Mamoiada (Sardeña, Italia).
O desfile, seguido por un numeroso público, baixaba dende O Toural ata a praza Maior da vila. Para velar pola seguridade contábase coa colaboración da Policía Local de Viana do Bolo, así como con diversas agrupacións de Voluntarios de Protección Civil, entre elas a de Viana, coa do GES da Veiga e coa da Garda Civil.
O programa da VibosMask continuará mañá a partir das 11:30h. cun novo desfile desta volta en Vilariño de Conso.
Fotos: A.R.
Máis información e fotos:
