Será unha xornada de reencontros, de emoción e de lembranzas ligadas ao intenso médio século de historia do CD Barco. Os xogadores que ao longo destes 50 anos pasaron polo club, nas súas diferentes categorías, están chamados a participar nunha xornada festiva moi especial que terá lugar o 23 de setembro. A iniciativa, promovida por antigos xogadores do club, facíase pública a finais de xuño. Agora xa está ultimado o seu programa, que se despregará ao longo de todo ese día.
O punto de encontro dos participantes será, a partir das 11:30h., o campo de fútbol de Calabagueiros. Alí compartirán unha petiscada, acompañada de viños e cervexas. Ademais faráselles entrega dunha camiseta conmemorativa a cada un dos asistentes. E, se xurden, mesmo poderían botar un partidiño de fútbol.
A continuación, os participantes, coa camiseta posta, dirixiranse camiñando ata o inicio da avenida Conde Fenosa (no cruce coa rúa da Estación) para visitar a exposición de copas e trofeos, así como de equimanento e outro tipo de material ligado ao CD Barco, instalada no escaparate do antigo Miranda Moda. E, despois, encamiñaranse cara o Teatro Lauro Olmo para continuar rememorando a historia do club a través dunha proxección de vídeo que recollerá imaxes das diferentes etapas e momentos do CD Barco. Tamén se incluirá unha exposición de fotografías, que amosarán a evolución e diversas épocas desta entidade deportiva.
Xa ao mediodía, os participantes na xuntanza desprazaranse ata o pavillón vello (á beira da praza do Concello) para asistir a un xantar que será servido por Mantesil. As persoas interesadas en asistir poderán mercar a súa entrada (cun prezo de 30 euros) ata o vindeiro 10 de setembro no Bar La Placita (na planta baixa do Edificio Multiusos). “Este xantar, como o conxunto dos actos, están abertos a calquera xogadores das diferentes categorías do CD Barco”, matiza o ex xogador Enrique Pérez Roca, dende a organización, en mans tamén doutros antigos compañeiros de club, José Miguel Castro,Tano Sarria, Roberto, Blanco e Marcos García “Taru”.
De seguro que a sobremesa, cargada de conversas se alongará ata a tarde, na que o programa continuará cunha “fin de festa” que terá como escenario a praza Maior do Barco. Así na terraza do Veira Sil está prevista a actuación dun grupo musical e, despois, “ata que o corpo aguante” terá lugar a actuación dun Dj.
Recordatorio ás persoas falecidas vinculadas ao CD Barco e ofrenda floral ao Nazareno
Como antesala deste encontro de antigos xogadores, no marco do 50 aniversario, está prevista un recordatorio ás persoas vinculadas ao club falecidas o 13 de setembro, véspera ademais do día do Cristo no Barco. “Foi unha idea que propuxo o párroco do Barco, Jesús Álvarez, e que nos pareceu unha boa iniciativa. Será ás 20h. coincidindo co último día da novena. Aí farase unha lembranza aos ex xogadores que hoxe xa non está con nós e tamén a directivos e a outras persoas ligadas ao club que faleceron. Tamén faremos unha ofrenda floral ao Nazareno”.
