Allariz acollerá o vindeiro domingo 9 de outubro a Festa Primagas, un evento que busca celebrar a chegada desta empresa especializada en gas e que traerá tamén aos actores galegos Fede Pérez e Marcos Pereiro. Metidos na pel do dúo Os Tristes, amenizarán a xornada co seu espectáculo, que se complementará cunha degustación de polbo e filloas, música e actividades e xogos populares para nenos. Levarase a cabo no Campo da Feira da Barreira, entre as 11:30 e as 14:30 horas.
A festa deseñada por Primagas para os alaricanos tamén terá tintes solidarios. Así, a recadación obtida nos postos de comida irá destinada á Asociación Puzzle de Allariz, unha entidade que loita contra a exclusión social e laboral das persoas con discapacidade. O Concello de Allariz tamén colabora co evento.