No Pazo de Raxoi, na praza do Obradoiro de Santiago, tomaban esta mañá posesión dos seus cargos os membros do novo executivo galego. Facíano ante o presidente da Xunta de Galicia, Alfonso Rueda. Tras a lectura dos decretos de nomeamento, un a un, dirixíanse á mesa para xurar ou prometer o seu posto xunto a unha copia do Estatuto de Autonomía, outra da Constitución e unha biblia.
A meirande parte dos doce conselleiros escollían a fórmula de xurar, agás o de Presidencia, Diego Calvo; a de Vivenda, María Martínez; o de Sanidade, Antonio Gómez Caamaño, e o de Mar, Alfonso Villares, que prometían.
O presidente da Xunta aseguraba que “estaremos á altura e empezamos a traballar xa”. Con este obxectivo, anunciou que o novo goberno no vai “perder o tempo” e referendou o “compromiso real” do novo equipo, ao que cualificou de “doce mais un”, para non defraudar a confianza depositada neles o 18 de febreiro. Neste senso, comprometeuse a que gobernarán para todos os galegos “para os que nos votaron, e especialmente para os que non nos votaron para merecer a súa confianza”.
Deste xeito, Rueda insistiu en que o obxectivo do novo Executivo galego é “superar os gobernos anteriores. Agardo que os gobernos que nos sucedan nos superen tamén a nós. Iso quererá dicir que Galicia segue a mirar cara a adiante, que segue progresando e que as persoas encargadas de facelo posible colleron este labor con todas as ganas do mundo”.
Na súa intervención, Rueda agradeceu o traballo realizado polos tres conselleiros saíntes —Ethel Vázquez, Julio García Comesaña e Elena Rivo— dos que gabou os méritos e a capacidade demostrada nas súas responsabilidades ao fronte dos seus cargos na Xunta. “Moitísima sorte alí onde lles leve a vida no que eles decidan”, desexoulles.
Tamén eloxiou a “valentía” amosada por aceptar incorporarse ao Goberno galego aos novos catro conselleiros: María Martínez Allegue, como conselleira de Vivenda e Planificación de Infraestruturas; Antonio Gómez Caamaño, na carteira de Sanidade; José López Campos, á fronte de Cultura, Lingua e Xuventude; e María José Gómez Rodríguez, en calidade de conselleira do Medio rural.
Do mesmo xeito, Rueda estendeu o agradecemento por aceptar “continuar” aos oito conselleiros que permanecen no goberno galego: Diego Calvo, Ánxeles Vázquez, Román Rodríguez, Fabiola García, María Jesús Lorenzana, Miguel Corgos, Alfonso Villares e José González, este último como titular da consellería de Emprego, Comercio e Emigración.
A todo o novo equipo desexoulle sorte, ao tempo que lles advertiu de que “a nosa sorte será a sorte de toda Galicia”. En todo caso, garantiu que o novo goberno galego vai traballar para que esa sorte se acompañe de traballo. “Normalmente é unha fórmula que funciona bastante mellor que só coa sorte”, matizou para concluír.
Despois da toma de posesión dos conselleiros tiña lugar a primeira reunión do novo Consello da Xunta, presidido por Alfonso Rueda.