Este mércores vén de celebrarse un encontro informativo, organizado polo PSdeG da comarca de Monterrei en Ríos, con produtores de agricultura ecolóxica no que participaron o portavoz socialista de medio rural no Parlamento de Galicia, Martín Seco, e o presidente de Verín Biocoop, Jose Luis Vaz na que puxeron en valor a importancia deste sector fundamental para o futuro do rural galego. No acto tamén participaron os parlamentarios socialistas Gonzalo Caballero, Adolfo Pérez Abellás, Miguel Bautista e Marina Ortega e o ex parlamentario Juan Carlos Francisco Rivera.
Na súa intervención Martín Seco enumerou as iniciativas parlamentarias do PSdeG ante a falla de apoio da Xunta de Galicia á produción ecolóxica e alertou que a Consellería do Medio Rural vai deixar sen axudas para a conversión á agricultura ecolóxica ao 43 por cento das hectáreas solicitantes.
O responsable socialista criticou que, logo de “promocionar e alentar” aos agricultores a dar o paso de adoptar a agricultura ecolóxica, ligado ao “Pacto Verde” da UE e ás futuras axudas para o ecolóxico, os fondos da Xunta son insuficientes e necesitan 2,4 millóns de euros adicionais para atender ás solicitudes. A consecuencia vai ser, dixo, o “atropelo” dos agricultores que se van atopar coa denegación das solicitudes de conversión ao ecolóxico.
Aseguraba tamén que o goberno galego de tombaba “o camiño contrario ao resto do Estado, que ten unha media de superficie en ecolóxico do 10,2 por cento, cando en Galicia está por debaixo do 5 por cento, malia que dende a primavera se teñen incorporado 250 novas explotacións, e a superficie aumentou en 12.000 hectáreas”. Alertou de que “para atender ás máis de 45.000 hectáreas certificadas polo Consello Regulador, o orzamento previsto para o período do 2023-2027 pola Xunta debera de triplicarse”.
Tamén Jose Luis Vaz, presidente de Verín Biocoop, explicou a importancia de producir alimentos sans sen prexudicar á terra e sinalou a relevancia do sector non só desde o punto de vista económico, senón demográfico, de medioambiente e para a saúde da cidadanía.
“As nosas pradeiras son reservas de carbono que mitigan o cambio climático” sinalou Vaz, ademais de enfatizar que os produtores en ecolóxico son “case autosuficientes e practicamos a economía circular”. O presidente de Verín Biocoop rematou coa lectura dun manifesto vinculado ao Consello Regulador da Agricultura Ecolóxica para reclamar que as axudas non exclúan a ningún dos produtores de Galicia coas partidas suficientes.
Dende o PSdeG recordaron que a Xunta fai “de cara á galería moitos chamamentos públicos para impulsar a agricultura ecolóxica en Galicia, se ben agora non garante partidas económicas suficientes para chegar a todo o sector”. Ao respecto, en resposta a preguntas dos produtores, Martín Seco incidiu en que “non se poden consentir estes recortes, toda vez que poñen en cuestión a viabilidade económica de moitos produtores”, e requiriu á consellería que “rectifique”.