CulturaCulturaÚltima hora

Preséntase “Argonautas”, novo proxecto do produtor petinés Alfonso Blanco

Trátase da súa primeira serie kids live action en coproducción entre Portocabo e RTVE para Clan

 

A produtora Portocabo, cuxo director xeral é o valdeorrés Alfonso Blanco “Fosco”, e RTVE veñen de asinar un acordo para coproducir ‘Argonautas’, a súa primeira serie infantil de imaxe real para a canle Clan, nunha aposta por descentralizar a produción e abrindo novas vías de coprodución. A serie contará co apoio da AGADIC (Xunta de Galicia) e rodarase este verán na cidade da Coruña e en Laxe.

‘Argonautas’ é unha serie aspiracional (20 episodios de 22’), na que unha cuadrilla de cinco amigos vivirá un verán incrible. Xuntos veranse inmersos nunha gran aventura enfrontando perigos e descubrindo o valor da amizade. A serie está inspirada en grandes clásicos da literatura e o cinema como ‘O club dos cinco’ ou ‘Os Goonies’, adaptados ao século XXI.

A presentación da serie tiña lugar esta mañá no Museo de Belas Artes da Coruña e contaba coa asistencia de Yago Fandiño, director de Contidos Infantís de RTVE e Clan; e Alfonso Blanco, CEO de Portocabo e produtor executivo da serie; Román Rodríguez, conselleiro en funcións de Cultura e Educación da Xunta de Galicia; Jacobo Sutil, director de AGADIC (Axencia Galega das Industrias Culturais); José Luis Pérez Añón, alcalde de Laxe; Jesús Celemín, concelleiro de Educación, Memoria Histórica, Innovación, Industria e Emprego do Concello da Coruña; xunto con Lucía Estévez e Toño López, que serán os directores da serie.

Yago Fandiño, director de Contidos Infantís de RTVE e director de Clan, destacou o interese da corporación por realizar este tipo de producións: “historias orixinais, rodadas en España, series que achegan un punto de vista fresco e representan valores propios dunha televisión pública”. A serie, producida en Galicia, é unha aposta da canle por abrir o abano a novas producións en diferentes rexións; unha declaración de intencións por parte da corporación, abríndose así outros camiños para a produción de series infantís españolas por parte de RTVE. Ademais, quixo salientar que ‘Argonautas’ “non se poderá ver só en España, senón tamén en Clan Internacional, que cubre toda América”.

 

O produtor valdeorrés, Alfonso Blanco./ Foto: Rocío Cibes.

 

Alfonso Blanco, o produtor executivo da serie e director xeral da galega Portocabo, expuxo o interese da produtora por producir series infanto-xuvenís en imaxe real, un formato con escasa presenza no mercado español pero que ten un enorme potencial e xa levantou interese en grandes distribuidores a nivel mundial. “Ter unha oportunidade como ‘Argonautas’, creada e producida desde Galicia é gran un logro para a produtora, na que buscamos facer proxectos dende aquí con capacidade para viaxar”, afirma Blanco, que vén de producir series como ‘The Avatars’ e ‘Miracle Tunes’, dúas series kids live action de gran repercusión.

Ademais, Blanco quixo salientar tamén que, de 14 xefaturas de equipo, 11 están ocupadas por mulleres, feito que o “ilusiona e anima a seguir traballando na liña na que o fai Portocabo”.

A ficción contou co apoio do HUB Audiovisual da Xunta de Galicia xestionado por AGADIC. Román Rodríguez, conselleiro en funcións de Cultura e Educación da Xunta de Galicia, contou que se trata dunha medida específica que ofrece unha inxección económica para as produtoras independentes galegas algo que, ademais de atraer rodaxes á comunidade autónoma, aumenta a competitividade e fortalece o tecido audiovisual galego. Trátase dunha operación financiada pola Unión Europea, a través do Fondo Europeo de desenvolvimiento Rexional (FEDER), como parte da resposta da Unión Europea á pandemia do COVID-19.

Ademais, tamén quixo poñer en valor o “traballo feito en Galicia, onde os nosos produtos audiovisuais chegan ás principais plataformas e canles internacionais froito do talento que temos no territorio”.

Fotos: Rocío Cibes.

Artigos relacionados

Back to top button