O Eixo Atlántico lidera un proxecto financiado pola Comisión Europea no marco do programa Interreg Europe, cofinanciado pola Unión Europea, no que participan 7 países europeos, ademais dos dous que integran esta entidade transfronteiriza. O proxecto céntrase nunha figura nova de interese para as estratexias do reto demográfico: nómadas dixitais. “Este novo concepto refírese a aquelas persoas que desenvolven o seu traballo a través de internet desde calquera lugar do planeta sempre que teña as condicións tecnolóxicas adecuadas para iso”, din dende o Eixo.
Isto constitúe un recurso idóneo para a repoboación de zonas do interior de baixa densidade de poboación pero cunha gran calidade de vida. Con todo, para que estes territorios sexan atractivos para os nómades dixitais, deben contar cunha adecuación de infraestruturas, tanto tecnolóxicas como educativas, de educación, recursos e servizos atractivos que posibiliten o desenvolvemento do seu traballo.
Este proxecto expón, ademais, a posibilidade de vincular as estratexias do reto demográfico coa innovación e a captación de talento, configurando unha folla de ruta que dote de competitividade aos territorios de baixa densidade de poboación e captación de investimentos para a xeración de actividade económica.
“Así mesmo, isto encaixa coa estratexia que desenvolve Secretaría Xeral para o Reto Demográfico de impulsar a creación de centros de innovación territorial para estas zonas, motivo polo que vincularon a este proxecto. A finalidade última é a elaboración dun catálogo de propostas que a Comisión Europea recolla nos seus programas futuros e que vincule as 3 prioridades da Eurorrexión: Reto demográfico, innovación e captación de talento”, di o Eixo.
Esta reunión celébrase en Ourense, nas instalacións da Deputación de Ourense xa que esta institución traballa activamente o tema da loita contra o reto demográfico a través doutros proxectos de Interreg, tales como USE4FOREST (Sudoe) e POST (Espazo Atlántico) que terán como territorio piloto O Barco de Valdeorras.
Na reunión, ademais de responsables da Deputación de Ourense, asistía Xoán Vázquez Mao, secretario xeral do Eixo Atlántico, e o seu vicepresidente, Alfredo García, rexedor barquense.
Fotos: Eixo Atlántico.
