A comporta da presa de Santiago, en Valencia do Sil (Vilamartín de Valdeorras), que permanecía na beira do Sil a uns 3 kms río abaixo, xa foi retirada. Os traballos iniciábanse por parte de persoal de Iberdrola, empresa que xestiona a presa, na mañá do martes 8 de marzo coa instalación dunha barreira anticontaminación para protexer a beira de posibles arrastres durante os traballos.
De seguido os operarios procedían á retirada que basicamente consistiu no fraccionamento da comporta en varios trozos, mediante unha máquina de gran tonelaxe provista dunha cizalla para cortar aceiro. Unha vez fraccionada en varias pezas de tonelaxe adecuado para ser manexadas pola retroexcavadora, que se fixeron o martes pola tarde e o mércores, durante a xornada deste xoves procedíase a súa retirada da beira do río e acopio na marxe dereita.
Tal como informan dende Iberdrola, nos vindeiros días procederase, xa na beira, ao corte da comporta en trozos menores para poder ser cargados e retirados definitivamente. Todo o proceso foi supervisado pola Confederación Hidrográfica do Miño-Sil e o Servizo de Patrimonio Natural da Xunta de Galicia, esperando que os traballos finalicen totalmente o vindeiro martes día 15.
