Bordea o Parque Natural do Invernadeiro (Vilariño de Conso), ofrecendo unhas vistas espectaculares. A coñecida como “Ruta da Ortiga” parte da aldea de montaña de Edrada, continuando por antigos camiños ata o Pico da Ortiga, “que grazas á súa altitude permite divisar a inmesidade do Parque Natural do Invernadeiro, a Cabeza de Manzaneda, Peña Trevinca e un sen fin de lugares”, tal e como destacan dende a Asociación Vive Vilariño.
Precisamente este percorrido será obxecto dunha actividade de sendeirismo promovida por Vive Vilariño e que está prevista para o vindeiro 15 de maio. Para anotarse será preciso poñerse en contacto coa entidade a través da súa páxina de facebook ou no 618 39 34 88.
A saída está prevista ás 9:15h. dende Edrada e o traxecto terá uns 10 kms de distancia (entre ida e volta). “A dificultade é alta, xa que o tempo aproximado para realizala é de 4 horas e media. O terreo está limpo e conta con monte baixo ao redor. E recoméndase levar bastón, bebida, gorra, calzado adecuado e un petisco para a metade de camiño”, indican dende Vive Vilariño.
Ademais faise fincapé na “na importancia do uso de mascarillas, así como de manter as medidas de distancia necesarias”.
