Conta atrás para o VIII Viñotapeo de Quereño (Rubiá). Este percorrido gastronómico e festivo que se desenvolve polas rúas da localidade e que cada ano atrae a máis participantes terá lugar o sábado 11 de maio a partir das 20h. Nesta edición contará con dez adegas de diferentes barrios nas que se ofrecerá ao público viño e outras bebidas, xunto con variados e saborosos petiscos. Serán as do Barrio do Regueiro, A Currelada, O Quintairo, A Igrexa, As Cortiñas, A Teixeira, A Estación I, A Estación II, A Estación III e a Estación IV. Ademais o ambiente estará animado pola música dunha charanga.
A entrada para poder participar neste Viñotapeo será de 10 euros e con ela entregarase unha taza e un pano. O punto de venda situarase, como en anteriores edicións, á entrada de Quereño esa mesma tarde.
Finalizado o traxecto, pasadas as once da noite, servirase café e bica para os participantes na zona da pista. Ademais haberá unha fin de festa con discomóbil. Esta singular celebración será organizada, un ano máis, pola Comisión de Festas de Quereño coa especial colaboración da veciñanza desta localidade valdeorresa.
