Rozando as doce da noite do 13 de febreiro os vianeses vivían un dos momentos máis intensos, emotivos e vibrantes do seu Entroido: a queima dos Lardeiros. A praza Maior enchíase de bombos e aixadas que non deixaban de sor, cun ritmo cada vez máis trepidante, mentres corría a fariña sen cesar por cada recuncho, apurando os últimos momento da principal festa do ano para Viana: o Entroido.
Preparábase a despedida do Lardeiro e da Lardeira que nestes días presidían a troula dende o alto do mastro da praza Maior. Alí, tiña lugar a súa queima como símbolo da despedida da festa. O epílogo do Entroido vianés terá lugar esta tarde co enterro da sardiña no Cabo da Vila.
Fotos: Carlos G. Hervella.
