Uns 600 gaiteiros procedentes de bandas de gaitas de diferentes municipios das provincias de Ourense, León, Lugo, A Coruña, de Asturias e Portugal, participarán o vindeiro sábado 25 de xaneiro na primeira fase do XI Certame Celtibérico de Bandas de Gaitas que se celebrará en Vilariño de Conso.
O evento comezará a partir das 11:30 horas, en memoria de Adelaida Domínguez Pérez, cantora de coplas de cego de Pradoalbar e a entrega de diplomas e medallas terá lugar ás 14:30 horas coa posterior interpretación de forma conxunta do Himno do Antergo Reino de Galicia. Ademais, o día anterior, venres 24 de xaneiro ás 17:30 horas, terá lugar a inauguración en Chaguazoso do monumento á copla “O caso das Piornizas”, creada por Leandro Besteiro no 1949.
A presentación deste evento cultural tivo tiña lugar esta mañá no Pazo Provincial, coa asistencia do vicepresidente da Deputación de Ourense, Rosendo Fernández; da alcaldesa de Vilariño de Conso, Melisa Macía; do director da Real Banda de Gaitas da Deputación, Xosé Lois Foxo; e o coleccionista de pliegos de cordel, Julio Domínguez.
O vicepresidente da Deputación de Ourense lembrou que o certame naceu con vocación de “servir como canle cultural ás bandas de gaitas de toda a Península Ibérica, sendo un complemento educativo ao ensino recibido na Escola de Gaitas da Deputación de Ourense”. Pola súa parte, o director da Real Banda de Gaitas da Deputación salientou que Vilariño de Conso converterase o vindeiro sábado “na capital da gaita e da nosa cultura”. Así mesmo, Melisa Macía afirmou que acoller este evento cultural supón tamén “homenaxear a nosa Banda de Gaitas, que leva máis de 30 anos realizando un importante labor a prol da nosa cultura e que, actualmente, conta con 25 integrantes”.