O personal técnico forestal da Xunta de Galicia na provincia de Ourense, aproveitaba o festivo das Letras Galegas do pasado 17 de maio para celebrar unha xuntanza en Casa Cardiego, no concello de Chandrexa de Queixa.
A convocatoria, á que asistían enxeñeiras e enxeñeiros do Servizo de Prevención de Incendios Forestais, do Servizo de Montes e dos cinco Distritos forestais en que se divide a provincia, tiña por obxectivo principal “facer equipo”, reforzando os lazos de compañeirismo máis aló da relación laboral que manteñen no seu día a día.
Así, durante a xornada abordábanse “diversas propostas e iniciativas sobre xestión forestal e defensa contra incendios, principais liñas de traballo deste colectivo, poñendo o foco en sentar as bases para definir unha postura común ante a inminente división do personal técnico dos Distritos forestais entre a Dirección Xeral de Defensa do Monte e a Dirección Xeral de Planificación e Ordenación Forestal”, segundo informan os organizadores do encontro.
O resultado da xornada, organizada polo Distrito XIII: Valdeorras-Trives, foi moi satisfactorio na opinión dos asistentes, de xeito que xa teñen en mente convocar novas reunións que terán lugar no resto de Distritos da provincia.
