OurenseÚltima hora

A CHMS apoiará as escavacións do campamento militar romano de Aquis Querquennis

O presidente da CHMS rubrica o convenio que posibilita a subvención de 50.000€ en favor da Fundación Aquae Querquennae- Vía Nova

Publicidade
Un dos momentos da sinatura do convenio.

 

O presidente da Confederación Hidrográfica do Miño-Sil (CHMS), José Antonio Quiroga, e o presidente do Padroado da Fundación Aquae Querquennae- Vía Nova, Antonio Rodríguez Colmenero, veñen de asinar o Convenio de colaboración que instrumenta a subvención nominativa de 50.000 euros, en favor da Fundación, tal e como recolle o orzamento do Organismo de conca para o ano 2021.

A Fundación executará parte dos traballos incluídos na campaña de escavacións que cada ano leva a cabo para continuar descubrindo os restos arqueolóxicos situado no pantano de As Conchas, río Limia, no concello de Bande.

Aquae Querquennae Via Nova ten como obxecto protexer, estudar e promocionar o complexo arqueolóxico que lle dá nome, un antigo campamento militar romano que, a día de hoxe, ocupa parte do leito do encoro de As Conchas, zona de dominio público hidráulico, así como a calzada romana coñecida como Vía Nova, que unía as cidades de Braga, en Portugal, con Astorga, en León.

 

 

Desde a Fundación solicitouse a colaboración económica da CHMS coa finalidade de continuar cos traballos de escavación e realizar unha intervención na paisaxe, tanto arbóreo como fluvial, que rodea o xacemento na zona contigua setentrional do encoro de As Conchas, desde a alameda de Porto Quintela ata o solar da antiga igrexa parroquial de O Baño, de oeste a leste, e entre o litoral norte do encoro e a estrada autonómica de Ourense e a fronteira portuguesa.

“A través deste investimento, o Estado contribúe a apoiar a recuperación do valioso patrimonio cultural, arqueolóxico e natural, situado no propio encoro, así como para efectuar o control de que as actuacións executadas cumpran coa normativa de Augas”, explicou o presidente da confederación.

Artigos relacionados

Back to top button