Os cidadáns do Distrito Sanitario de Valdeorras volvían concentrarse neste mércores ás 12h. pedindo que se recuperen os servizos perdidos no hospital do Barco, nun acto que vén convocado a Xunta de Persoal deste centro dende primeiros de outubro. No seu decurso, Víctor Pariente, membro da citada xunta de persoal, respondía ás declaracións que facía onte o delegado da Xunta en Ourense na súa visita a Larouco. “Veu dicir que a culpa desta situación é que non hai taxa de reposición. Eu explícovos o que significa a taxa de reposición: é a reposición do persoal que se xubila do Sergas ou doutras administracións. No 2012 a taxa de reposición en Sanidade fixouna o goberno central do PP no 70%, a día de hoxe está no 100%, iso xa se corrixiu no pasado 2016”.
Ademais, engadía Pariente, “no caso da Xunta, do Sergas, cando convoca as oposicións a taxa de reposición non é o 100% das persoas que se xubilan, senón aquelas que eles consideran que son necesarias. A taxa de reposición non se está cumprindo no 100%, pero tamén é certo que nos orzamentos non se contemplan prazas novas. Esa é a realidade”.
Con respecto á priorización dunha praza de traumatoloxía a nivel autonómico para o HPV e outra de rehabilitador, o represante da Xunta de Persoal incidía en que “a plantilla de traumatólogos é de catro e a de rehabilitarés é de tres, ou sexa que non solucionamos nada con iso”. E sobre as conversas da Xunta con responsables sanitarios de Castela e León, Pariente aseguraba que “en Castela e León non hai ningunha noticia deste asunto”.
No decurso desta concentración facíanse públicos o horario e o percorrido da manifestación prevista para finais de novembro. “A manifestación do 28 de novembro segue adiante e imos seguir reclamando unha sanidade igual que calquera cidadán do resto de Galicia, nin máis nin menos. Comezar ás 12h. con saída da Casa Grande de Viloira e acabará diante do hospital”, indicaba Pariente.
Así mesmo, daba a coñecer que a Xunta de Persoal tomaba onte a decisión de levar unha única pancarta abrindo a marcha. “Para todas aquelas organizacións que poidan estar presentes, ou partidos políticos, onte na reunión da xunta de persoal decidimos só levar pancarta de cabeceira”.
Fotos: O SIL.
