O Concello de Ourense participa estes días, na cidade checa de Karlovy Vary, na Asemblea Xeral da Asociación Europea de Vilas Históricas e Termais (Ehtta), a través da titular da área de Turismo e Termalismo, Isabel Castelo. Aborda xunto a representantes doutras 30 localidades o futuro das políticas turísticas e termais europeas.
Ademais Castelo e o seu equipo asisten a diferentes reunións sectoriais, entre elas a de Comunicación e Turismo, co obxectivo de debatir a expansión do colectivo, que recibe novos membros que se suman así ás máis de 40 cidades que a integran actualmente.
Por outra banda, a cidade das Burgas tamén se promocionará activamente na feira B-Travel de Barcelona, que se define como unha das máis importantes do sector turístico a nivel europeo. Nese encontro, Ourense estará presente a través da súa promoción dentro da Rede de Cidades AVE, á que se adheriu recentemente.