O artista barquense está nominado como mellor actor revelación por este espectáculo nos oitavos Premios do Teatro Musical
Tras sete meses de “Priscilla. Reina del desierto” sobre o escenario do Nuevo Teatro Alcalá de Madrid, unhas 200 funcións e máis de 250.000 espectadores, o actor valdeorrés Christian Escuredo confésase “encantadísimo”. Neste espectaculo encarna a Felicia/ Adam un dos tres protagonistas. “É a primeira vez que interpreto a un protagonista e ademais cunha resposta tan positiva tanto do público como da crítica”, asegura.
A esta acollida súmase agora a súa nominación como mellor actor revelación na oitava edición dos Premios do Teatro Musical, cuxo obxectivo é potenciar a industria deste tipo de xénero teatral en España. Neste concurso “Priscilla” é tamén a obra con maior número de nominacións: un total de 14 en 13 categorías. Os ganadores serán escollidos polos propios profesionais do sector que realizarán as súas votacións a través da páxina web oficial dos premios, sendo a data límite para facelas o vindeiro 12 de maio.
Ao mesmo tempo, en maio Christian Escuredo comezará a rodaxe da súa nova película: “El silencio de los objetos”, ópera prima de Iván Rojas. “Será unha longametraxe que compaxinarei ata o 7 de xuño co musical “Priscilla”. O filme trata de tres historias independentes e entre os actores do reparto están rostros coñecidos como Mónica Cervera, Inma Cuevas ou Emilio Gavira; pero tamén outros menos coñecidos como é o meu caso. Eu protagonizo unha das tres historias, xunto á televisiva Inma Cuevas”, explica Escuredo.
O 7 de xuño rematará a tempada de “Priscilla. Reina del Desierto”, que estará de novo en cartaz en agosto.
Máis información na edición en papel do Periódico O Sil