Ata terras pontevedresas desprazábanse na xornada do 16 de xuño medio cento de triveses para participar no XXVII Encontro de Maiores, en Baión–Vilanova de Arousa, que congregaba a máis de 300 persoas das catro provincias galegas, entre as que había tamén veciños de Viana do Bolo e de Celanova. A iniciativa estaba organizada pola Asociación Cultural O Castro (Baión–Vilanova).
O programa comezaba cun fermoso percorrido en barco pola ría, amenizado polo Grupo de Acordeóns do Salnés, onde recibían explicacións sobre o funcionamento das bateas de mexillón e podían velas ben de preto.
Despois, xa en terra e nunha zona con vistas ao Pazo Baión, asistían a unha mostra de oficios, costumes tradicionais como sega, malla, debullar o millo, corta do toxo, cesteiros, carpinteiros, zoqueiros, oleiros, canteiros, ferreiros, esceas de lavadoiro… Unha serie de costumes que para eles supoñía unha viaxe no tempo e revivir momentos da súa mocidade.
Seguidamente tiña lugar un xantar de confraternidade entre todos os participantes no pavillón, no que tamén actuaba un dúo musical. A continuación dábase paso a novas recreacións de oficios tradicionais ata o remate xornada. Dende o Concello da Pobra de Trives expresábase o seu agradecemento á A.C. O Castro “por convidar a maiores de Trives a participar no seu encontro e parabéns pola organización”.
Fotos: Concello de A Pobra de Trives.
