Galicia está nunha situación de descenso da incidencia de Covid na que as medidas sanitarias vixentes están sendo útiles, pero hai que “manter a prudencia”, de aí que Galicia continúe coas máximas restricións e con peches perimetrais. Así o asegura o presidente da Xunta de Galicia, Alberto Núñez Feijóo, que vén de anunciar esta mañá, tras a reunión do Comité Clínico de expertos que segue a pandemia do Covid, unha flexibilización de certas medidas en ámbitos como do comercio.
Así a partir do mércores 17 de febreiro o comercio volverá ao seu horario habitual, pero cun aforo aforo máximo dun 50%, pero “de momento, mantense o peche dos centros comerciais nas fins de semana”. Esta medida será publicada, entre outras, no Diario Oficial de Galicia.
Polo de agora a hostalaría continuará pechada, pero si reabrirán as instalacións hostaleiras en áreas de servizo para transportistas.
Tamén se permitirá a actividade cultural en bibliotecas, museos, salas de exposicións, cines e teatros ao 30 % de aforo máximo.
Apertura da hostalaría
Ante a actual situación epidemiolóxica, o presidente da Xunta pide “paciencia” e sinala que o vindeiro luns día 22 de febreiro o Comité Clínico volverá avaliar as actuais restricións. A intención é establecer unha estratexia de apertura de maneira conxunta co sector hostaleiro nun horizonte seguro cando os datos así o avalen.
Ademais coa máxima seguridade coa colaboración das forzas de seguridade, garantindo a distancia de 1,5 metros de distancia, os aforos máximos e a participación dos alcaldes nas tarefas de inspección. Todo acompañado dun sistema de rastrexo específico para o sector hostaleiro.
Ademais previsión do comité sería que, en paralelo á reapertura da hostalaría, poderían levantarse varias das restricións, como a das reunións de non conviventes.
