O Consorcio de Turismo Ribeira Sacra pon en marcha neste verán de 2023 a proba piloto do servizo de transporte en microbús lanzadeira aos principais recursos deste destino. E faino como medida para evitar os habituais problemas de estacionamento en embarcadoiros, mosteiros ou áreas de ocio con elevada afluencia de visitantes.
Recentemente, o organismo recibiu o Plan de Acción do Plan de Mobilidade Sostible Ribeira Sacra (PMS), o cal, entre outras cuestións, recolle as problemáticas habituais que experimenta o destino en tempada alta en determinados recursos, como son os embarcadoiros, mosteiros ou outras zonas de ocio, como a Praia da Cova. A tal efecto, o documento contempla como posibles solucións a implantación de novos servizos de transporte turístico colectivo ou o trasvase modal de acceso a embarcadoiros (lanzadeiras).
Con isto, e tendo en conta as consideracións do equipo experto responsable da elaboración do PMS, o Consorcio de Turismo pon en marcha unha proba piloto deste servizo de lanzadeiras que comezaba no día de hoxe, 15 de xullo, en 5 puntos do territorio que rexistran unha elevada afluencia de visitantes e tránsito de vehículos na tempada estival.
“Os 5 novos servizos funcionarán gratuitamente todos os días entre o 15 de xullo e o 30 de agosto. Esta periodicidade permitirá analizar o funcionamento do servizo nas semanas máis fortes en afluencia do ano. Cos resultados acadados e os axustes que sexan precisos, levaríase a cabo a organización e/ou contratación dos servizos lanzadeiras de cara aos períodos de tempada alta do ano 2024”, segundo informa o Consorcio de Turismo Ribeira Sacra.
Do mesmo xeito, os horarios plantexados para este verán 2023 “son unha proposta de frecuencias para avaliar o nivel e picos de demanda do servizo, de tal xeito que estes poden sufrir variacións ao longo da tempada en función da demanda real de prazas”, enganden dende o consorcio.
Tamén se indica que “a capacidade do transporte variará dependendo do percorrido a realizar, entre as 16 e 30 prazas por traxecto. Póñense así a disposición máis de 1.200 prazas diairias nas lanzadeiras para intentar desconxestionar de vehículos as áreas de maior afluencia de visitantes e problemáticas para o estacionamento”.
Os itinerarios das lanzadeiras serán os seguintes:
Monforte de Lemos – Embarcadoiro de Belesar | 28 prazas (retrasa o seu comezo ao luns 17 polo curte de estradas vencellado á Subida a Chantada)
Monforte de Lemos – Doade (pobo) – Embarcadoiro de Ponte do Sil | 28 prazas
Escairón – Belesar – Praia da Cova | 16 prazas
Castro Caldelas – Abeleda (pobo) – Embarcadoiro de Abeleda | 29 prazas
Lanzadeira ao mosteiro de Santo Estevo de Ribas de Sil | 19 prazas
Enlace aos horarios: https://turismo.ribeirasacra.org/es/lanzaderas-ribeira-sacra-2023
Estas 5 lanzadeiras súmanse á do Mosteiro de Santa Cristina de Ribas de Sil, posta en funcionamento no verán do 2021, tamén no marco do Plan de Sostibilidade Turística en Ribeira Sacra.
Está habiliatada a reserva previa de prazas en todos os servizos de lanzadeira, agás no do mosteiro de Santo Estevo, onde non será precisa.
Para os primeiros días contamos cunha media de 80-120 reservas sendo o mes de agosto o que máis solicitude rexistra en todos sos servizos.
Ligazón para as reservas (ata 1 hora antes da saída): https://turismo.ribeirasacra.org/es/reservas | https://turismo.ribeirasacra.org/lanzadeiras-ribeira-sacra-2023
Máis información: turismo@ribeirasacra.org | 638 823 592 (10:00 a 18:00 h).
Fotos: Consorcio de Turismo da Ribeira Sacra.
