Ao longo de dous días, o venres 26 e o sábado 27 de agosto, o Paseo do Malecón do Barco será escenario do VIII Mercaberto, unha iniciativa promovida polo Barco Centro Comercial Aberto (CCA) e pola Asociación Empresarial de Valdeorras (AEVA) en colaboración co Concello.
Nesta feira participan unha ducia de expositores: Moral Zapatería, Can-Can, Librería Murciego, Novedades Maribel, Mis Personajes, Fíos Moda, Ton y Son, Perfumería-Droguería Damas Escuredo, D’Chus, Paka-Maka e Pilardos. Tamén conta cun posto propio a asociación Asfaval.
Nestes stands achegarase ao público a moi bo prezo artigos de sectores tan diversos como o “téxtil, zapatos, agasallos, complementos, música, decoración…”, tal e como resaltaba no acto inaugural a presidenta do Barco CCA, Sandra Moldes. Lembraba asemade o horario de apertura da feira: ata as once da noite o venres e o sábado 27 de 11h. a 14h. e, pola tarde, ata as once da noite. Ademais agradecía a colaboración do Concello do Barco. Ao lado, o alcalde barquense, Alfredo García, destacaba o positivo desta iniciativa e poñía en valor a importancia do sector comercio no municipio.
Ademais como actividade complementaria a esta mostra, a partires das once da noite do venres 26 de agosto actuará nas proximidades do recinto feiral o grupo valdeorrés “Los Íñigos”, que se caracteriza por facer versións de temas dos anos 80 e 90.
Fotos: Ángeles Rodríguez.
