Na praza de Viloira (O Barco) iniciábase ás 12h. este 5 de xuño, Día Mundial do Medio Ambiente, unha ruta arredor do Sil pero, sobre todo, arredor da memoria ligada a el a ambas beiras: tanto a de Viloira como a do Barco. A iniciativa forma parte das actividades dos catro Talleres “Fiando a Memoria” que dende o pasado outubro vén impartindo no Barco Outonía Coop. Tres das participantes deses obradoiros (Chochi, Mari e Loli) convertíanse en particulares guías para un grupo de estudantes do último ciclo do CEIP Otero Pedrayo, nesta singular viaxe pola vivencias persoais e colectivas arredor do Sil.
“Durante estes meses, a través dos grupos de estimulación cognitiva fomos vendo que había un eixo común que vinculaba ás persoas, que era o río Sil, e relacionadas con el, comezaron a aparecer relatos individuais, por exemplo, como e onde se lavaba, anécdotas sobre este labor ao que ao mellor non se lle daba valor e que tamén é importante visibilizar… Entón iniciamos unha investigación e comezaron a emerxer historias persoais que ata agora estaban baixo a auga, pero que xuntas configuran a arqueoloxía social e cultural destas poboación. E con esta iniciativa, a xeito de aprendizaxe e servizo, quixemos compartilas coas crianzas”, comenta Blanca, monitora dos talleres.
Neste percorrido, que pasaba tamén por zonas emblemáticas do casco antigo barquense como o Porto da Barca, e cunha parada na antiga fonte situada nunha baixada ao río na rúa San Roque, as guías contaban historias e botaban man dun mapa e de fotografías nas súas explicacións aos escolares. “Trátase de que haxa unha participación social a través das propias voces desas persoas aos nenos, esas experiencias forman parte desa cultura da auga”, engade Blanca.
Ademais a idea de organizar esta ruta no 5 de xuño, non foi casual. “Quixemos tamén aproveitar esta data para crear conciencia, nun momento de cambio climático e de emerxencia climática como o actual. Estas tres mulleres explicaban, por exemplo, como se lavaba antes, sen producir ningún tipo de resíduos e aproveitando os recursos que había, de forma natural. Hai que crear conciencia para poder coidar
Ademais o alumnado co CEIP Otero Pedrayo realizaban unha poesía e un debuxo que formará parte da exposición que os Obradoiros de Memoria inaugurarán o vindeiro 15 de xuño na Casa do Río Cigüeño, e que reunía o labor e a investigación conxunta realizada ao longo destes meses no Barco.
Fotos cedidas.