A Sala de Exposicións do Pazo Municipal da Coruña acollerá durante os próximos meses unha exposición do artista barquense Iván Prieto. Trátase da súa colección “Icarus”, un proxecto moi grande e interesante centrado no mito de Ícaro, con varias instalacións e tamén pezas de pequeno formato, que “dalgún xeito resumen os meus dous últimos anos en Berlín, recollendo o traballo que estiven facendo”, explica o propio artista afincado na capital alemana. A mostra é unha especie de autorretrato, resultado da experiencia de vivir no estranxeiro e de como se afrontan os retos e a realidade alí. “É un pouco a representación da caída de Ícaro porque sempre se teñen moitas expectativas pero a realidade é dura”, asegura.
Natural do Barco de Valdeorras, Iván Prieto ten nas súas mans o poder de crear un mundo de personaxes entre a realidade e a caricatura, entre a mitoloxía e o mundano, entre a cor e a palidez. Personaxes que senten, padecen e transmiten sensacións tan reais, que absorven unha parte do propio autor.
A inauguración da exposición será este xoves 13 de outubro ás 20 horas.
