Entre os puntos aprobados na sesión plenaria celebrada esta tarde pola Corporación municipal do Barco estaba a incorporación do Concello á estratexia Fast-Track Cities an Municipalities (Cidades e Municipios de resposta rápida ao VIH/SIDA). Tratábase dunha moción socialista que expoñía o concelleiro de Sanidade, Orlando Saavedra, e na que comezaba lembrando que o 1 de decembro de 1994 un total de 42 estados, entre eles España, asinaban a Declaración do Cumio de París sobre a SIDA” co compromiso de “protexer, promover, mediante a contorna xurídica e social, os dereitos das persoas, en particular das que viven co VIH/Sida ou están máis expostas á infección”.
A moción, que resultaba aprobada por unanimidade, pedía adherirse á citada estratexia “cuxos obxectivos e recomendacións permiten orientar a posta en marcha de accións locais, que potencien a prevención do VIH e outras enfermidades de transmisión sexual (ITS) e que melloren a calidade de vida das persoas con viven con VIH e Sida”. Ademais acordábase asinar o documento da Declaración de París co “compromiso de centrarnos no VIH, mobilizar recursos para lograr unha mellor integración de saúde pública e desenvolvemento, construír e acelerar as estratexias en materia de VIH e usar a resposta á Sida como catalizador para unha transformación social positiva”.
A continuación, o pleno debatía outra moción, desta volta presentada polo concelleiro do BNG, Suso Vilasánchez, para “acadar o compromiso dos grupos políticos presentes na Deputación de Ourense e acordar o desenvolvemento dun plan único de axuda e financiamento aos concellos, por parte da Deputación de Ourense para o próximo mandato 2023/27.
“Unha das principais competencias das deputacións provinciais é a asistencia económica aos municipios, especialmente a aqueles de menor capacidade económica de xestión. Esta asistencia pode materializarse de forma clara e con carácter ordinario, seguindo criterios obxectivos como os xa establecidos pola Fegamp (en base a superficie, poboación, entidades de poboación e índice de envellecemento), e así fan as deputacións galegas, agás a de Ourense”, dicía na súa intervención o edil do BNG, Suso Vilasánchez, que pedía na súa moción que o “Concello do Barco traslade ao pleno da Deputación de Ourense para os efectos oportunos, o seu acordo de solicitar o compromiso a tódalas organizacións políticas nel presentes para definir un plan único similar ao das demais deputacións galegas que sexa de aplicación anual para o mandato 2023/27, seguindo os criterios da Fegamp”.
A moción tamén resultaba aprobada, pero desta volta cos votos de Riada Cidadá e do PSdeG-PSOE, cuxo portavoz municipal, Aurentino Alonso, lembraba que esta petición xa se ten levado ao pleno provincial en varias ocasións. Ademais expoñía numerosos datos comparando o financiamento da Deputación de Ourense aos concellos co das outras deputacións galegas. Pola súa banda, o PP votou en contra, alegando que “a provincia de Ourense presenta unhas características que non son comparables ás do resto das provinciais galegas”.
