O CEIP de Casaio (Carballeda de Valdeorras) e o CEIP Plurilingüe Ramón Otero Pedrayo (Amoeiro) concluíron a súa participación en “O MUV na escola rural”, programa da Fundación María José Jove para fomentar a accesibilidade á cultura e, especialmente, á arte contemporánea, dos menores do rural galego.
Os dous centros foron seleccionados pola entidade entre escolas de toda Galicia e durante tres semanas alumnado e docentes puideron visitalo e implementar os recursos creados, xa que Fundación habilitou en cada centro educativo un espazo con computador e lentes de realidade virtual. Abordaron a situación de urxencia que atravesa o Planeta e a crise climática que estamos a vivir, desde diferentes perspectivas. A través de 8 actividades e percorridos, o alumnado reflexionou sobre a situación do presente e as claves que nos trouxeron ata aquí, para concluír facendo exercicios de imaxinación cara ao futuro.
As actividades están deseñadas para acompañar e complementar as visitas ao MUV co obxectivo de xerar espazos de análises e reflexión sobre o medioambiente a través das artes. No CEIP de Casaio, o último día realizaron unhas máscaras con materiais recolleitos previamente da natureza, imaxinando como será a vexetación do futuro. E no CEIP Ramón Otero Pedrayo de Amoeiro, tomando como referencia a performance ‘Visor’ da artista Lygia Pape, o último día realizaron unha acción colectiva denunciando a situación do Planeta.
Desde a área de arte da Fundación María José Jove e da contorna virtual MUV, explóranse novos contextos para facer máis accesible a cultura e a arte contemporáneo. Desta maneira, perséguese introducir as novas tecnoloxías nas aulas a través de accións culturais interactivas; potenciar o pensamento artístico no alumnado como vehículo de relación; fomentar a conciencia ambiental e valores para a preservación ambiental, así como utilizar as prácticas artísticas como ferramentas transversais nos centros educativos.
O programa exponse como un proxecto colaborativo entre as escolas seleccionadas, a través do que xerar unha rede de intercambio de saberes. Para iso, os centros contarán cun caderno de bitácora dixital onde poder compartir relatos e experiencias. Posteriormente os materiais didácticos xerados, así como algúns dos resultados da experiencia nos centros educativos, recolleranse nunha publicación dixital que estará dispoñible na web do museo: https://muv.fmjj.org/.
