O CEIP de Casaio (Carballeda de Valdeorras) e o CEIP Plurilingüe Ramón Otero Pedrayo (Amoeiro) son dúas das 8 escolas seleccionadas pola Fundación María José Jove en toda Galicia para a III edición de ‘O MUV na escola rural’ un programa co que a entidade quere “fomentar a accesibilidade á cultura e, especialmente, á arte contemporánea, dos menores do rural galego”.
Trátase dun programa da Fundación María José Jove (FMJJ) que leva fisicamente o seu Museo Virtual (MUV) ás escolas rurais e co que contribúe a eliminar algún dos obstáculos aos que estes centros enfróntanse día a día. ‘O MUV na escola rural’ desenvolverase de xaneiro a xuño de 2024 e estará en cada escola 3 semanas, durante as cales alumnado e docentes poderán visitalo e implementar os recursos creados durante a formación. Para levalo a cabo, a Fundación habilitará no centro educativo un espazo con computador e lentes de realidade virtual.
O CEIP de Casaio é un dos elixidos debido á súa situación. “É un colexio que está no alto da montaña e rodeado de grandes picos, como Pena Trevinca. Ao ser unha zona tan afastada o número de alumnos é moi pequeno. Neste curso tan só hai 9 en todo o colexio: 4 de educación primaria e 5 de educación infantil. En canto aos mestres, hai un mestre fixo e tres mestras itinerantes”, tal como aseguran dende a Fundación Mª José Jove.
Accesibilidade á cultura
Desde a área de arte da Fundación María José Jove e da contorna virtual MUV, explóranse novos contextos para facer máis accesible a cultura e a arte contemporáneo. Desta maneira, perséguese introducir as novas tecnoloxías nas aulas a través de accións culturais interactivas; potenciar o pensamento artístico no alumnado como vehículo de relación; fomentar a conciencia ambiental e valores para a preservación ambiental, así como utilizar as prácticas artísticas como ferramentas transversais nos centros educativos.
O programa exponse como un proxecto colaborativo entre as escolas seleccionadas, a través do que xerar unha rede de intercambio de saberes. Para iso, os centros contarán cun caderno de bitácora dixital onde poder compartir relatos e experiencias. Posteriormente os materiais didácticos xerados, así como algúns dos resultados da experiencia nos centros educativos, recolleranse nunha publicación dixital que estará dispoñible na web do museo: https://muv.fmjj.org/.
