Proposto pola Asociación Universitaria de Ciencias da Educación AUCE, co obxectivo de favorecer o coñecemento de diversos deportes de xeito lúdico aos usuarios da Asociación ADO de persoas con diversidade funcional, o proxecto “Xogando a todo” botaba a andar este venres 31 de xaneiro na Casa da Xuventude de Ourense.
Segundo o programa, cada mes (os xoves pola mañá), monitoras da Asociación, mostrarán un deporte a través de xogos, partidos e dinámicas alternativas, para fomentar os hábitos saudables entre os participantes. O mes de febreiro estará adicado a balonmán; o mes de marzo a baloncesto; o mes de abril a baile moderno e, o mes de maio, a fútbol gaélico.
A iniciativa conta ademais coa colaboración de Decathlon Ourense, que dotará de material específico para poder desenvolver as propostas de xeito axeitado, e da Casa da Xuventude, que cede as súas instalacións para os adestramentos.
