Membros da comunidade educativa do Centro Integral de Formación Profesional Someso da Coruña veñen de coñecer in situ as singularidades do proceso produtivo da lousa. Un grupo de oito profesores e 40 alumnos de diferentes ciclos formativos relacionados coa construción, a edificación, a obra civil ou as reformas, entre outros, deste centro coruñés visitaba esta mañá a sede do Clúster da Pizarra de Galicia, onde o seu xerente, Severino González, lles daba a benvida e detallaba pormenorizadamente as peculiaridades do proceso produtivo da lousa, un ámbito de actividade que ten o seu epicentro en Valdeorras dentro de Galicia.
Posteriormente, o grupo achegábase ata unha nave da empresa Los Tres Cuñados, en Casaio (Carballeda de Valdeorras). Tras esta visita, o programa prosegue con de unha comida de confraternización en Fonte da Cova, antes finalizar o percorrido desprazándose ata unha canteira de Pizarras Vazfer.
A ruta proposta, con paradas no Clúster, nunha nave e nunha canteira tiña como obxectivo “dar a coñecer, aos membros da comunidade educativa deste centro de formación profesional, a cadea de valor da lousa a través dun proceso que inclúe extracción, corte e dimensionado de bloques, labrado e recorte, selección e embalaxe para a súa posterior comercialización”, tal e como indican dende o sector.
A visita enmárcase dentro da liña de acción do Clúster da Pizarra de Galicia de abrirse á sociedade para dar a coñecer e poñer en valor a relevancia dun ámbito de actividade esencial dentro da economía galega.
