Entre o 16 e o 24 de setembro, con motivo do Día Internacional de Limpeza de Praias, desenvolverase a sétima campaña de concienciación cidadá “1m2 polas praias e os mares”, que forma parte do Proxecto LIBERA, de SEO/ BirdLife en alianza con Ecoembes. Consiste en recoller e caracterizar a basuraleza de 302 puntos de España, entre os que estarán a praia do Coiñedo e a praia dos Franceses, no concello valdeorrés da Veiga. O obxectivo desta iniciativa é coñecer o impacto da basuraleza nos espazos naturais, neste caso na contorna mariña, así como liberalos destes residuos abandonados.
Os voluntarios de diferentes organizacións, entidades e asociacións uniranse para identificar e analizar a basuraleza colleitada nas distintas localizacións elixidas. O obxectivo do resultado desta recollida é xerar estratexias efectivas que poidan abordar de maneira eficiente este desafío ambiental.
Entre os 28 puntos de Galicia nos que se organizarán as accións, destacan, entre outros, as citadas praias valdeorresas, a praia porto de Santa Cruz (A Coruña) ou a ría de Vigo (Pontevedra). Esta sétima edición de “1m2 polas praias e os mares” contará coa participación de organizacións colaboradoras como AHE Galicia ou os concellos de Veiga (Ourense) e Burela (Lugo). Ademais doutros colectivos a nivel nacional como Cruz Vermella Española, Asociación Home e Territorio, Oceánidas, Asociación Terramare, ADESP, Alnitak, Mater, Asociación Región de Murcia Limpa, ou ANSE.
O uso da app MARNOBA, deseñada pola Asociación de Vertidos Cero e KAI Marine Services, permitirá, como en cada edición, que as persoas voluntarias poidan categorizar os residuos atopados. Ao final da campaña, estes datos uniranse aos máis de 1 millón de obxectos rexistrados por LIBERA desde 2017 no ‘Barómetro da Basuraleza’, e introduciranse na base de datos do Ministerio para a Transición Ecolóxica e o Reto Demográfico de España (MITECO).
Na última campaña rexistráronse 7,1 toneladas de basuraleza das costas españolas grazas á participación de máis de seis mil persoas voluntarias. A partir desta cantidade, caracterizáronse 62.334 residuos, sendo as cabichas, as pezas de plástico pequenas, as pezas de plásticos grandes, as toalliñas húmidas e as pezas metálicas os obxectos máis atopados en 2022.
“Este tipo de iniciativas é un bo reflexo da globalidad dos problemas e a importancia de poñer en marcha medidas a nivel mundial. Os mares vomitan ás costas residuos que foron abandonados en calquera rexión do planeta nun abanico temporal de varios anos. Non podemos seguir vertiendo 11 millóns de toneladas de plástico aos océanos cada ano. Ningún ecosistema ten unha capacidade infinita de asimilación de contaminantes sen colapsar”, afirma Miguel Muñoz, coordinador do Proxecto LIBERA en SEO/BirdLife.
“Esta sétima campaña ‘1m2 polas praias e os mares’ é crucial para seguir abordando a crecente ameaza da basuraleza nas contornas naturais. Por iso, desde LIBERA temos que seguir fomentando e impulsando a colaboración de todas as comunidades a solucionar este grave problema. Un problema que máis aló das razóns estéticas, afecta gravemente á contaminación das augas ou á saúde dos animais mariños e terrestres”, afirma Sara Güemes, coordinadora do Proxecto LIBERA en Ecoembes.
