Logo da prata en K1 Sub23 acadada na xornada no sábado no Campionato de España de Maratón en Pontevedra, o barquense Adrián Prada Pérez (Club Piragüismo Verducido Pontillón) volvía tomar a saída nesta proba nacional este domingo 8 de maio, pero desta volta na categoría K2 sénior e compartindo barco con Joaquín Iglesias Rodríguez.
O padexeiro valdeorrés acusaba o esforzo do día anterior, tendo en conta ademais que neste caso a distancia da proba era de 30 km con 7 porteos, pero aínda así o seu barco lograba manterse en oitava posición ata a metade do campionato. Finalmente, o seu K-2 entraba en meta en 12ª posición (cunha marca de 1:54:50.91), conseguindo o cuarto posto no campionato galego desta categoría.
Polo tanto, balance moi positivo nesta fin de semana para Adrián Prada, que é adestrado por Javier Villanueva “Jabucho”, tendo en conta ademais que o segundo posto nacional que lograba en K1 é clasificatorio para o Campionato de Europa de Maratón de Moscú en xullo, o seu vindeiro obxectivo.
