O Festival Internacional de Curtas de Verín (FIC) Vía XIV intensificará neste 2023 as actividades que adoita orientar ao público infantil, unha axenda que de sempre contou cunha ampla aceptación entre a cativada de Verín e comarca. Así, por vez primeira este ano, a organización do certame decidiu incluir na grella oficial unha categoría infantil con catro curtas programadas especialmente para seren visionadas polos máis pequenos. Trátase dos traballos O Monstro e a nena; Ovo; Papirola e Chimborazo.
O pase destas curtas está fixado para a mañá do xoves 14 de setembro, no Auditorio de Verín, e dende a Dirección do FIC convidouse a todos os colexios da comarca a participar na actividade. Unha actividade na que, ademais de visionar as curtas, os rapaces e rapazas asistentes poderán votar de xeito lúdico polo seu traballo favorito. Porén, o premio á mellor curta desta categoría será outorgado polo xurado profesional, ao igual que acontece co resto de categorías.
A axenda infantil do FIC estará dirixida pola narradora oral Raquel Queizás quen, no decurso da mesma mañá na que se proxecten as curtas, interactuará cos cativos e cativas co obxectivo de familiarizalos “coa maxia do cine” a través do fío condutor da ciencia ficción nunha actividade que levará por título Vémonos no futuro.
Novos mundos
“Este espectáculo, que mesturará a narración oral co teatro e co cinema, convida á rapazada a unha fantástica viaxe no tempo. Imos descubrir, no FIC de Verín, o poder da literatura e o cine para imaxinar futuros: futuros pasados. Imos coñecer as primeiras adaptacións literarias de ciencia ficción levadas para a grande pantalla. Gozaremos dos pioneiros efectos especiais”, destaca Raquel Queizás.
“Esperan por nós moitas aventuras que nos van levar, fotograma tras fotograma, á descuberta de novos mundos. Imos visitar unha metrópole descoñecida. Coñeceremos robots moi humanos, científicos tolos, guerreiras galácticas, homes invisibles… Como broche final, gozaremos coas curtas seleccionadas polo Festival. Imos así ver historias que fomentan o respecto pola natureza, pola amizade e os coidados, pola liberdade, pola paz, pola tolerancia e mais a igualdade entre homes e mulleres”, engade a narradora oral.
Para Carlos Montero, director do FIC Vía XIV de Verín, “é moi importante incentivar que os nenos e nenas da comarca poidan achegarse á cinematografía cunha actividade, perfectamente deseñada e dirixida por unha profesional con experiencia, cuxo obxectivo é axudar a que se poida espertar neles o interese pola sétima arte e conformar espectadores críticos para o día de mañá”.
