O delegado do Goberno en Galicia, Pedro Blanco, visitaba esta mañá A Pobra de Trives para asistir a unha reunión coa cidadanía para trasladarlle os programas e servizos que ofrece o Goberno para que familias e empresas do rural poidan acceder a internet de altas prestacións a través de satélite e fibra óptica. Neste encontro, aberto a medios, estaba acompañado pola alcaldesa trivesa, Patricia Domínguez, e polo subdelegado do Goberno na provincia, Emilio González; o xefe de Inspección de Telecomunicacións, Enrique Sanmartín. Tamén asistían outros alcaldes da zona e concelleiros.
Blanco informaba da activación do programa UNICO-Demanda Rural, a través do cal máis de 228.000 familias e empresas de Galicia poderán solicitar unha conexión ultrarrápida a internet a prezo competitivo. O delegado do Goberno explicou que este programa é unha solución transitoria que ofrece o Goberno en tanto en canto non conclúen os proxectos de extensión da fibra óptica que se están a executar e que teñen como obxectivo garantir a conectividade do 100% do territorio de Galicia a finais de 2025. “En Galicia, o Goberno está a mobilizar máis de 107 millóns de euros a través do programa UNICO-Banda Ancha para dotar de fibra óptica a 226.725 familias e empresas de Galicia, 55.700 na provincia de Ourense, e 1.472 no concello de A Pobra de Trives”, dicía.
Pedro Blanco reafirmou que “dispoñer dun servizo de conexión a Internet de altas prestacións e cun custo competitivo é un elemento básico para frear o despoboamento do rural e romper coa fenda do mundo rural e o urbano”.
Reducir a fenda dixital
O Programa UNICO-Demanda Rural depende do Ministerio de Asuntos Económicos e Transformación Dixital e forma parte do Plan de Recuperación, Transformación e Resiliencia. O Ministerio adxudicou en febreiro deste ano a execución do mesmo á empresa Hispasat por 76 millóns de euros. Durante este tempo, Hispasat chegou a acordos coas operadoras de servizos e puxo en marcha a plataforma a través da cal se pode facer a contratación: https://conectate35.es/
Na reunión de hoxe, explicouse o procedemento para acceder a este programa. En primeiro lugar, o usuario pode consultar no mapa elaborado polo Ministerio de Economía e Transición Dixital se a zona en que se sitúa o inmoble é unha “zona elixible”. Posteriormente, na páxina web habilitada por Hispasat, buscar a apartado “Contratación” e acceder como “Son un usuario”. Alí poderá elixir a provincia na que se sitúa a súa vivenda, seleccionar un dos operadores minoristas que prestan servizo na súa zona e solicitarlle o servizo de conexión a internet vía satélite. Pedro Blanco explicou que na provincia de Ourense, por exemplo, as persoas solicitantes poden escoller entre seis empresas de servizos de internet.
Unha vez efectuada a solicitude, son estas empresas as que xestionan a alta do servizo e encárganse de solicitar a axuda para a instalación e o equipamento. A persoa usuaria terá que abonar o prezo fixo de 35 euros mensuais, que permanecerá invariable ata decembro de 2027.
Fotos: Carlos G. Hervella.
