O profesor, escritor, investigador e filólogo Antonio Carreño González, natural de Parada de Sil, é desde hoxe Medalla de Ouro da provincia. Esta condecoración vén de concederlla a Deputación de Ourense “como homenaxe e recoñecemento do pobo de Ourense a toda unha vida dedicada á docencia, á incansable e rigorosa investigación e xunto coa súa superación persoal que o levou dende Parada de Sil a ser considerado o máis alto especialista mundial na figura de Lope de Vega”, tal e como quedou reflectido, a través da lectura da acta a cargo do instrutor do expediente, César Fernández, no acto solemne desta mañá, que estivo presidido polo máximo responsable provincial, Luis Menor, coa asistencia de diversas autoridades como o delegado da Xunta en Ourense, Gabriel Alén, ou o alcalde de Parada de Sil, Aquilino Domínguez, e o seu concelleiro de Cultura, Paco Magide.
Tras a lectura da “laudatio” do homenaxeado a cargo do xornalista Lalo Pavón, quen glosou o “apabullante currículum docente e investigador de Antonio Carreño” e lembrou que “chegar a tal nivel académico non foi doado, pois naceu nunha casa dunha aldea de Parada de Sil onde o que abondaba era o traballo e a necesidade”, tomou a palabra o homenaxeado, o profesor Carreño.
“Non foi fácil. Non, non foi fácil estar hoxe aquí. Non foi fácil chamarse Antonio Carreño. Como escribía o afastado Francisco Aldana, o Divino, «Tras tanto acá e alá, indo e vindo», un indaga no inconsciente dun mesmo a mítica volta á súa casa. O que sae da súa casa e sempre quere volver repite a viaxe de volta, real ou imaxinado, do gran Odiseo celebrado por Homero na Odisea, de volta á súa Ítaca, á beira da súa Penélope. O espazo da distancia e do encontro; da añoranza e da inquietude. E no meu caso, da man da palabra”, sinalou Antonio Carreño, quen articulou o seu discurso, precisamente, ao redor da importancia da palabra.
Por último, Antonio Carreño agradeceu a distinción da Deputación: “Esta medalla que me concede a cidadanía de Ourense é tamén un recoñecemento e unha homenaxe ao labor pedagóxico de quen ensina, instrúen e educan ás novas xeracións coa palabra. Sen afán de lucro, altruístas, sen esperar nin desexar ningún recoñecemento. O labor pedagóxico, profesionais da educación, moldea o futuro dunha sociedade. Instruír, educar, a través da palabra clara, precisa, ás veces contundente, de boca do profesor. Amolda unha conduta, unha identidade. E o futuro do que seremos”.
Agradecemento a todos os que o fixeron posible
No peche do acto, o presidente provincial destacou que “a Deputación de Ourense, como depositaria da representación xeral da cidadanía e por decisión dos seus representantes, expresou por unanimidade a concesión da Medalla de Ouro a Antonio Carreño, pasando así a integrar o selecto grupo dos fillos distinguidos. Foi un traballo iniciado pola anterior Corporación provincial que agora rematamos. Grazas a todos os que o fixeron posible”.
No tocante ao legado do homenaxeado, Menor destacou que “as letras e traballos de Antonio Carreño seguen no tempo ás de figuras senlleiras de Ourense como o insigne Padre Feijóo ou o lembrado Ben-Cho-Sey. Si, un orgullo para min e a miña veciñanza, permítanme a licencia, pois ambos os dous eran orixinarios do concello de O Pereiro que me honro tamén en presidir, e cuxo legado sigue vixente”. Luis Menor quixo amosar o agradecemento a Luis Carreño en nome da provincia: “Grazas por tanto, profesor. Ourense sempre estará en débeda con vostede, polo que esta medalla non só é merecida, tamén é moi necesaria”.
O acto solemne rematou co himno da provincia, “Ourense no solpor”, que previamente comezara coa sinatura de Antonio Carreño no libro de honra da Deputación provincial.