Entre os puntos que figuraban na orde do día da sesión plenaria da Corporación municial do Barco deste xoves 2 de novembro estaba o de delegar unha serie de competencias que ata de agora tiña o pleno para pasalas á Xunta de Goberno Local, onde soamente hai concelleiros do grupo de goberno socialista. A proposta resultaba aprobada unicamente polos 9 representantes do PSdeG-PSOE, fronte aos votos en contra da oposición: PP (con 5 edís) e BNG (con 3 concelleiros).
En concreto, as competencias que a partir de agora pasarán á Xunta de Goberno serán as seguintes, tal e como detalla o secretario municipal durante o pleno: “o establecemento de prezos públicos mediante acordos de imposición, a ampliación do número de anualidades así como elevar as porcentaxes relativas aos gastos plurianuais a que se refire o apartado 3 do artigo 174 da Lei de Facendas Locais e 84 do R.D. 500/1990, a aprobación dos proxectos de obras e servizos competencia do pleno para a súa contratación ou concesión e cando aínda non estean previstos nos orzamentos, o exercicio de accións xudiciais e administrativas e a defensa da corporación en materia de competencia plenaria, e a revocación de actos ditados en vía de xestión tributaria, a solicitude e aceptación de subvencións convocadas por outra administracións públicas cando non sexan competencia do pleno da Corporación, a resolución de recursos de reposición que se interpoñan contra os actos ditados pola Xunta de Goberno Local no exercicio das atribucións delegadas polo pleno da Corporación”.
O voceiro socialista, Aurentino Alonso, comezaba a súa intervención sinalando que “simplemente se trata dunha serie de competencias que os técnicos entenden que sería máis áxil a tramitación dos expedientes e de todos os procedementos se estas competencias están na Xunta de Goberno, que se reúne practicamente todas as semanas, mentres que o pleno se reúne unha vez ao mes. E algunha vez isto nos ten obrigado a convocar algún pleno extraordinario. Polo tanto, por parte deste Grupo de Goberno non se lle quere furtar ningún tipo de competencias ao pleno, senón que en base á proposta que se nos fai dende a parte técnica do Concello, nós a asumimos. Despois de 24 anos estas competencias que estiveron no pleno, agora se entende que é máis áxil que sexan exercidas pola Xunta de Goberno local, pois nós facemos o que nos digan os técnicos”.
A súa intervención non convenceu en absoluto aos dous grupos da oposición, que amosaban o seu malestar. O primeiro en intervir era o concelleiro do BNG, Suso Vilasánchez, quen lembraba que o pleno representa ao conxunto da cidadanía do Barco. “Vostedes son maioría pola lei D’Hont, vostedes representan a todos os barquenses e a oposición tamén, pero os grupos da oposición xuntos teñen máis votos detrás que vostedes. Dende logo non estaba dentro dos nosos compromisos coa cidadanía facer abandono de funcións e delegar competencias do pleno na Xunta de Goberno Local; a cidadanía non entendería para que nos elixiu”. Así mesmo o concelleiro nacionalista dicíalle ao alcalde, Alfredo García, que “vostede non pode crer que O Barco é vostede, vostede é o encargado polo pleno de gobernalo, vostede é un concelleiro, elixido polo pleno para gobernar O Barco e nós elixidos pola cidadanía para controlar os seus actos de goberno. Polo tanto, non podemos nin por ética nin por respecto aos nosos votantes acceder á proposta da alcaldía de delegar competencias do pleno na xunta de goberno”.
Vilasánchez cualifiaba ao rexedor de “alcalde farón” e indicáballe que “vostede non pode facer pirámides, pero quere facer obras faraónicas que preserven a súa esencia e demostren o seu poder, e para iso precisa expropiar, mercar, ceder, hipotecar… e cousas así, mais consciente do declive do seu fulgor político pretende facelas ás agochadas, evitando o debate político e a exposición pública e para iso precisa quitarlle competencias ao pleno, que é un acto público e de debate coa oposición e pasarllas á Xunta de Goberno Local, onde todos son do seu grupo de goberno”. Finalmente, o concelleiro nacionalista pedíalle ao alcalde que respectase “os foros e liberdades democráticas e éticas, retire esa proposta ou lembre a Luis XVI”.
O voceiro do PP, Manuel Núñez “Noli” manifestaba estar de acordo co exposto por Vilasánchez, e engadía que “estamos aquí para construír, non para tragar, os nosos votantes, non nos van a permitir que non teñamos o único foro onde podemos debater, protestar e patalexar. Con maioría absoluta vostede pode pasar o rodillo, entón, actúe en consecuencia”.
O alcalde socialista simplemente contestaba dicindo que “nós isto nunca o plantexamos e decidimos aceptar esta proposta, da que aínda quitamos cousas, pero isto serviu para que o voceiro do BNG faga un discurso brillante e absolutamente fóra de lugar, pero xa estamos tamén moitas veces acostumados a este tipo de peroratas. En calquera caso non o imos a retirar porque todo iso que vai aí vai pasar por comisión, é dicir, ningunha decisión que se tome, se é que toma algunha que afecta a eses apartados, se tomará sen pasar por comisión, polo tanto a oposición vai estar enterada e vai a poder aportar, porque as comisións tamén valen, nelas trabállase e fanse propostas”.
Finalmente o punto saía adiante unicamente cos votos a favor socialistas.