En torno aos 300 usuarios participan xa no proxecto “Voluntariado marrón” posto en marcha polo Concello do Barco de Valdeorras para a recollida selectiva de lixo orgánico en contedores específicos de cor marrón. Deses 300 inscritos, preto de 40 son empresas (comercios, restaurantes e supermercados), e institucións como centros de ensino con comedor escolar, hospital, residencias de anciáns e outros.
A instalación dos colectores realizouse a primeiros de xaneiro, e desde entón está aberto o prazo para que os interesados se inscriban para poder dispor da chave que dá acceso aos colectores instalados na vía pública. “A participación estase a incrementar de xeito gradual, e nestes momentos recóllense aproximadamente 500
quilos de residuos orgánicos nos 45 colectores situados nas rúas, e outros 7 entregaron en supermercados, hospital e residencia de anciáns”, puntualizan dende o Concello, engadindo que a recollida deste colectores para o seu traslado á planta de reciclaxe estase a realizar os luns e os venres.
Ademais, dende o Concello lembran que todos os que queiran sumarse a esta iniciativa poden conseguir a chave coa que se abren os contedores situados nas rúas, pasando polo edificio Multiusos, en horario de oficina, para inscribirse e recibir un cubo de 10 litros de capacidade, un paquete de bolsas biodegradables e a chave coa que se abren os contedores marróns.
O colector marrón, que ten como uso exclusivo a recollida de residuos orgánicos, pretende avanzar na adaptación do sistema de recollida de lixo no Barco aos novos criterios de xestión de residuos que indican tanto desde Europa como desde a Xunta de Galicia, e tamén lograr que o proceso de recollida de lixo sexa máis sostible. Para logralo, é moi importante a implicación da cidadanía, razón pola que se realizou unha xornada de información e sensibilización o 21 de decembro pasado.
Os residuos que poden ir neste colector marrón son exclusivamente os restos de froita, verdura, carne e peixe, conchas de mariscos e froitos secos, restos de pan, café, infusión, papel de cocina, restos de plantas, cortizas, e en definitiva calquera resto orgánico. Por contra, o que nunca debe depositarse neste colector son os envases, cueiros, compresas, bastonciños dos oídos, plásticos e outro tipo de residuos non orgánicos.