“O regreso do lobo ás rexións da Unión Europea nas que estivo ausente durante moito tempo está a provocar cada vez máis conflitos coas comunidades agrícolas e de cazadores locais, especialmente cando as medidas para previr ataques ao gando non se aplican de forma xeneralizada”, aseguran dende a Comisión Europa, que vén de anunciar que se vai proceder a revisar o estado de protección desta especie en Europa.
“A concentración de lobos nalgunhas rexións europeas converteuse nun perigo real para o gando e, potencialmente, tamén para os seres humanos. Insto as autoridades locais e nacionais a que tomen medidas cando sexa necesario. De feito, a lexislación vixente da UE xa lles permite facelo”, en palabras da presidenta da Comisión Europea, Ursula von der Leyen.
Neste senso, a Comisión poñía en marcha o 4 de setembro unha nova fase para abordar os retos relacionados co retorno dos lobos e convida ás “comunidades locais, aos científicos e a todas as partes interesadas a que presenten, como moi tarde o 22 de setembro de 2023, datos actualizados sobre a poboación de lobos e os seus efectos. Para iso, poderán utilizar a seguinte dirección de correo electrónico: EC-WOLF-DATA-Collection@ec.europa.eu“.
A partir dos datos recolleitos, a Comisión decidirá sobre unha proposta para modificar, no seu caso, o estatuto de protección do lobo na UE e “actualizar o marco xurídico a fin de introducir, en caso necesario, unha maior flexibilidade, á luz da evolución desta especie. Isto complementará as actuais posibilidades que ofrece a lexislación da UE para que as autoridades locais e nacionais tomen medidas cando sexa necesario”. Tamén está previsto un financiamento significativo da UE para estas medidas, tal como se detalla nunha carta conxunta enviada polo comisario Sinkevičius e o comisario Wojciechowski a todos os ministros de Agricultura e Medio Ambiente da UE en novembro de 2021.
“Algunhas medidas demostraron ser eficaces para previr ou reducir significativamente os riscos de depredación cando se executan correctamente e adáptanse ao contexto específico no que se aplican.
A revisión por parte da Comisión dos datos científicos sobre o lobo na UE forma parte integrante da análise en profundidade que a Comisión está a levar a cabo en resposta á Resolución do Parlamento Europeo do 24 de novembro de 2022”, explica a Comisión.
En abril de 2023, a Comisión comezaba a recompilar os datos dos grupos de expertos e das principais partes interesadas, así como os datos notificados polas autoridades nacionais conforme a lexislación da UE e internacional vixentes. “Con todo, estes datos seguen sen ofrecer unha imaxe completa suficiente para que a Comisión deseñe novas medidas”, polo que a Comisión está a ampliar a consulta.
Antecedentes
A Comisión Europa é consciente de que “o regreso do lobo ás rexións da UE nas que estivo ausente durante moito tempo pode dar lugar a conflitos coas comunidades agrícolas e de cazadores locais, especialmente cando as medidas para evitar ataques ao gando non se aplican de maneira xeneralizada”.
Como especie autóctona, proseguen dende este organismo europeo, o “lobo é un elemento integral do patrimonio natural de Europa e desempeña un papel importante nos seus ecosistemas. En virtude da Directiva sobre os hábitats, a maioría das poboacións de lobos en Europa goza dunha protección estrita, con posibilidades de excepción. Este réxime aplica os requisitos do Convenio internacional de Berna relativo á conservación da vida silvestre e do medio natural en Europa, do que son parte a UE e os Estados membros. As plataformas rexionais e da UE sobre coexistencia permiten ás partes interesadas promover formas de minimizar os conflitos entre os intereses humanos e a presenza de grandes carnívoros, intercambiando coñecementos e colaborando entre si de maneira aberta, construtiva e respectuosa. Ademais, en virtude da Directiva sobre os hábitats, os Estados membros poden, en determinadas condicións, establecer excepcións ás prohibicións do réxime de protección rigorosa, tamén co fin de protexer os intereses socioeconómicos”.
