A Área Sanitaria de Ourense, Verín e O Barco de Valdeorras, que xestiona os tres hospitais públicos e 106 Centros de Saúde da provincia, dispón este ano dun orzamento de máis de 527 millóns de euros (527.346.803€) para “atender as necesidades asistenciais dos ourensáns, que ascende ao 4,56% de todo o presuposto da Xunta de Galicia, quintuplicando o das principais institucións da provincia”, tal e como informa a Consellería de Sanidade.
Os orzamentos do Servizo Galego de Saúde en Ourense representan case o 4,56% dos presupostos anuais da Xunta de Galicia e o 11,76% do conxunto do Sergas. En 2021 os orzamentos da sanidade pública ourensá increméntanse nun “27,31% con respecto ao de hai cinco anos, en 2016, e 36.766.717 € máis que en 2020, ascendendo en tódolos capítulos, moi especialmente no de persoal, que supón xa máis da metade do orzamento, e aumenta un 8,48% con respecto a 2020, máis ainda en primaria, onde este incremento ascende un 11.07%, (máis de 7 millóns de euros máis), na liña do compromiso da Consellería de Sanidade co Plan Galego de Atención Primaria 2019-2021”, tal e como indica Sanidade.
Por capítulos, a maior porcentaxe do investimento anual destínase ao persoal dos Centros de Saúde e Hospitais, máis de 5.500 profesionais, pertencentes a máis de 30 categorías, entre persoal facultativo, sanitario e non sanitario, nos que o Sergas de Ourense inviste un total de 265.377.255 €, dos que preto do trinta por cento corresponde a atención primaria e o resto a hospitalaria.
No referente á formación, destínanse máis 6 millóns de euros, cun crecemento do 4,63% con respecto a 2020, “na liña estratéxica de aumento das prazas de formación de residentes (MIR) das distintas especialidades. De feito este incremento ascende ao 22.65% con respecto a 2016. O que representa unha aposta polo mantemento do sistema público e crecemento futuro, precisamente no principal valor da sanidade pública, os seus profesionais”, segundo a consellería.
246 millóns de euros para material e tratamento
Seguido do de persoal, o capítulo de gastos correntes disporá de 155.727.056 euros, que maioritariamente destinase a todo aquelo preciso para os coidados, desde os gastos xerais de subministro eléctrico, calefacción ou mantemento dos hospitais e centros de saúde, ao material e instrumental sanitario, implantes, tratamentos farmacolóxicos, ou alimentación. Para elo, en 2021 a sanidade pública disporá de 15 millóns de euros máis, crecendo máis dun 55% con respecto a 2016 e máis dun 10% con respecto a 2020.
A suma máis elevada deste capítulo destínase a farmacia e material sanitario, maioritariamente de tipo hospitalario, deles, case 54 millóns de euros, se corresponden con gran parte dos tratamentos farmacolóxicos, de carácter hospitalario, tanto de pacientes ingresados como ambulatorios, entre os que se inclúen os tratamentos oncolóxicos ou oncohematolóxicos dos tres hospitais da provincia.
Asemade, os orzamentos deste ano, inclúen unha partida, no capítulo VI, o destinado a investimentos, de máis de 14 millóns de euros, que se adicarán, na súa maior parte, ao Plan Director do Hospital Universitario de Ourense, así como ás actuacións de reforma, ampliación e equipamentos previstos nos Hospital Público de Valdeorras e o de Verín, ademáis do proxecto de reforma do Centro de Saúde Novoa Santos.
