Na mañá de hoxe, 24 de outubro, celebrouse a gala de entrega de premios da VII edición do OUFF Escola no Auditorio Municipal de Ourense. Este certame, convocado pola Concellería de Cultura do Concello de Ourense, a área Normalización Lingüística e o propio Festival de Cine Internacional de Ourense (OUFF), en colaboración coa Secretaría Xeral de Normalización Lingüística, naceu co obxectivo de impulsar o uso do galego entre a mocidade, coñecer a visión desta sobre a súa contorna sociocultural e fomentar a creatividade audiovisual e o traballo en equipo nunha linguaxe atractiva para o alumnado, que contribúa a xerar un espírito crítico.
Nesta edición participaron un total de 74 pezas nas que colaboraron máis de 2.000 alumnos. O xurado estivo formado pola cineasta Ángeles Huerta; o asesor técnico da Secretaría Xeral de Política Lingüística da Xunta, o director Héctor Domínguyez-Viguera Queija; a actriz Sara Casasnovas e a coordinadora territorial dos equipos de dinamización lingüística da provincia, Manoli Maseda.
Desas case 80 pezas, este xurado decidiu conceder o primeiro premio en categoría de Infantil ou Primaria para “Quero un patio novo”, do CEIP Coirón Dena, de Meaño; dotado de 600 euros para o centro. O segundo galardón, de 400 euros, foi para a curta “Conversas en lata” do CEIP Torre Illa, da Illa de Arousa. Finalmente, o premio ao mellor guión foi para “Árbores no camiño” do CEIP Eduardo Pondal, de Vigo e obtiveron 300 euros de premio.
Na categoría doutros niveis de ensino non universitario, o primeiro premio foi para “Verba”, creado polo alumnado do IES Macías o Namorado de Padrón, dotado con 600 euros. O segundo galardón foi para “Algo Pasa en Guitiriz”, do IES Poeta Díaz Castro, de Guitiriz, e recibiron 300 euros. Finalmente, o premio ao mellor guión nesta categoría foi para “O Rumor”, do IES Santiago Basanta Silva, dotado con 300 euros, de Vilalba (Lugo).
O xurado tamén quixo facer unha mención especial polo seu traballo ao IES de Arzúa.
