Ao grande. Así quere despedirse da afección o Centro de Deportes Barco que xogará o último partido de liga (na preferente sur Galicia) en casa, este domingo 12 de maio contra o Portonovo SD.
O partido comezará ás 18 horas e a entrada ao campo municipal de Calabagueiros será de balde. Ademais o club convidará a todos os asistentes a un pincho de xamón asado.
Con respecto ao apartado deportivo, os de Lino Estévez tentarán repetir as últimas vitorias tanto en liga (1-2 no campo do Antela) como en Copa Deputación (1-0 contra o Atlético Arnoia), acercándose todo o que poidan á metade da clasificación.
O último partido de liga para os vermellos será no campo do Xuvenil Cambados.
