Do 21 ao 25 de novembro o Club Alpino Ourensán organizará a XXIV Semana Audiovisual cunha serie de proxeccións e charlas que se celebrarán ás 20:30h. no Centro Cultural Marcos Varcarcel na cidade de Ourense. “Nesta edición tratamos de amosar a nosa filosofía de club a través dos invitados que se achegan a compartir connosco as súas vivencias, historias e actividades cas que podemos identificarnos. Dende aquí tamén queremos invitar a calquera persoa a asistir ás mesmas, sendo a única limitación o aforo da sala”, explican dende esta entidade.
A entrada é libre e o programa comezaráo 21 de novembro da man do fotógrafo Fran Nieto nunha sesión titulada “A fotografía de Paisaxe, unha visión persoal”. Nieto é un fotógrafo especializado en macrofotografía e paisaxe, con diversos premios na súa traxectoria. Autor de varios libros de fotografía así como ten publicado fotos en diversas revistas relacionadas ca natureza (Natura, Quercus, etc).
Ao día seguinte intervirá o alpinista Florentino Taín nunha exposición titulada “Alpinismo a 7000 metros”. Amosará como o desexo de vivir unha ascensión a un gran pico convertiuse no proxecto de completar o Snow Leopard coas súas 5 montañas de máis de setemil metros. A de Taín é “unha vida ligada a montaña. Escalador e montañeiro ourensán con múltiples escaladas en catro continentes (fáltanlle Oceanía e Antártida). Equipamentos de vías deportivas e de clásica en rocha así como tamén vías invernais”, explican os organizadores da xornada.
Para a tarde do 23 de novembro contarase co escritor Pablo Batalla Cueto quen abordará a “escritura de “La virtud en la montaña” – Vindicación dun alpinismo lento, ilustrado e anticapitalista”. É licenciado en Historia pola Universidad de Salamanca e colaborador en diversos medios de comunicación.
Xa o 24 de novembro as xornadas continuarán coa montañeira Karina Pérez (Montañeira) e co aventureiro Pepe Ocejón cunha intervención titulada “NEPAL, soa ou acompañada?”, que achegará ao público as vivencias de Karina na súa víaxe a Nepal catro anos despois da súa primeira viaxe, compartindo nesta ocasión víaxe con outras 11 persoas que acababa de coñecer.
Finalmente, o 25 de novembro o escalador Víctor Sánchez falará sobre “Resiliencia, a arte da liberdade”, a historia de superación persoal dun montañeiro e escalador asturiano tras un grave accidente. Sánchez é guía de escalada e montaña, cun amplo currriculum de cumes ademais de múltiples aperturas de vías en Picos de Europa así como aperturísta de gran número de vías de escalada deportiva.
