O Concello de Ourense abre o prazo de inscrición para participar nos concursos de coplas e maios da Festa dos Maios, que se celebrará o domingo, día 7, desde o mediodía, na rúa do Paseo. Asociacións culturais, colexios, grupos, colectivos veciñais, entidades e particulares poden inscribirse até o martes 2, ás 14 horas. O Concello incrementa os premios nesta convocatoria, de xeito que quen realice o mellor maio artístico recibirá 900 euros, e o mellor maio enxebre, 600 euros. Tamén aumentan os segundos e terceiros premios: 700 e 500 euros para os artísticos, e 400 e 300 euros para os enxebres, e amplíanse a tres os premios do apartado de maios infantís, dotados con 300, 200 e 100 euros, respectivamente. A festa está declarada de interese turístico polo Consello da Xunta de Galicia do 4 de outubro de 2001.
Na categoría de Maios, establécense as categorías de Maio Enxebre -o tradicional e figurativo, que representa pirámides, conos ou cruceiros, cunha altura mínima de 1.5 metros desde o chan-; Maio Artístico -recrea, cos materiais tradicionais, escenas cotiás, monumentos ou obras de arte do pobo ou da cidade, personaxes, etc.-; e o Maio infantil, realizado por nenos e nenas, menores de 18 anos, colexios, ANPA…
Entre as normas para a construción de maios artísticos están as de ser realizados integramente para a ocasión e non utilizar obxectos recubertos, para crear formas ou figuras. O musgo que se utilice deberá estar cosido ao esparto, nunca pegado, que será causa de descualificación. E os materiais a empregar serán tradicionais: madeira, sacos de esparto, musgo, xestas, uces, carqueixas, carrabouxos, flores silvestres, etc.
Os premios do Maio artístico serán: un primeiro de 900 euros, un segundo de 700 e un terceiro de 500. Para o Maio enxebre, de 600, 400 e 300 euros respectivamente. Para o Maio infantil, de 300, 200 e 100 euros respectivamente.
Nas coplas haberá dúas categorías: as Infantís -para menores de 18 anos- e as de adultos. O xurado valorará a retranca, a composición, o ritmo e a linguaxe utilizados, o uso da melodía tradicional e que as estrofas vaian enlazadas. Haberá un premio de 300€ para as mellores coplas de cada categoría.
Ademais, concederase unha axuda pola participación de 300 euros para os Maios presentados -ata esgotar o crédito dispoñible, de 18.000 euros-.
