Neste 19 de maio celébrase o Día Mundial da Enfermidade Inflamatoria Intestinal (EII), doenza crónica, de carácter inflamatorio e orixe autoinmune, que afecta en Ourense a máis de 1.200 persoas, cunha media de 50 novos casos anuais, a seguemento polo Servizo de Aparato Dixestivo da Área Sanitaria de Ourense, Verín e Valdeorras, e máis especificamente pola súa Unidade Integral de EII.
A EII engloba un grupo de enfermidades, entre as que destacan a de Crohn e a Colite Ulcerosa, e se caracterizan por cursar en brotes, con fases activas e de remisión, moi variables en función dos pacientes, pero que poden afectar intensamente a súa saúde e calidade de vida, xa que alteran a capacidade do organismo para dixerir os alimentos, e absorber os nutrientes; alternando síntomas como diarreas, sangue nas feces, cansazo, dor abdominal ou perda de apetito e de peso.
Para a súa atención, a Área Sanitaria de Ourense conta cunha Unidade Integral de Atención aos pacientes con Enfermidade Inflamatoria Intestinal, unha das primeiras a nivel europeo, en funcionamento desde 2003, e que recibíu en 2020 a certificación de Excelencia, que a sitúa como referente a nivel autonómico e nacional, tras ser auditada por Bureau Veritas, nunha iniciativa do Grupo Español de Traballo en Enfermidade de Crohn e Colitis Ulcerosa (GETECCU) para avaliar e promover o funcionamento de unidades especializadas.
A Unidade de Ourense está formada por catro médicos de aparato dixestivo e unha enfermeira, especializados en enfermidade inflamatoria intestinal, cun sistema de traballo que promove a accesibilidade e o contacto cos pacientes, para facilitar o seu seguemento, e a vocación multidisciplinar en colaboración e contacto permanente cos referentes en cada servizo no manexo de EII, desde profesionais de cirurxía, a reumatoloxía, nutrición, farmacia ou radioloxía.
As claves, tanto para mellorar o prognóstico da EII como para controlar os seus síntomas son o diagnóstico precoz, o tratamento multidisciplinar e personalizado de cada un dos pacientes, así como a súa monitorización. Neste senso a súa certificación de calidade, avalía o labor desenvolvido polo seu equipo humano, favorecendo a continuidade asistencial de calidade e a aposta pola investigación e a innovación.
Un dos seus integrantes, o doutor Santiago Soto, salienta os avances farmacolóxicos que “abren un amplo abano de posibilidades terapéuticas, permitindo tratamentos máis persoalizados”, igualmente destaca que no eido da diagnose a incorporación da ecografia intestinal “permite explorar o intestino evitando nalgúns casos os exames endoscópicos”.
Parte do equipo, acompañados polo xerente, Félix Rubial, visitaron esta mañá no Hospital Universitario de Ourense, a mesa informativa instalada pola Asociación de Crohn e Colite Ulcerosa de Ourense (ACCU Ourense) e compartiron a súa vontade de continuar colaborando como ata agora, recuperando iniciativas conxuntas previas á pandemia.