A cidade de Ourense acolle unha das paradas do “Correlingua 2023”, unha xornada reivindicativa da lingua galega que este ano congregará 1.315 alumnos e alumnas de diferentes centros escolares da provincia de Ourense, oito deles da nosa cidade. O Concello colabora coa organización deste evento, metade festivo metade reivindicativo, que culminará cunha camiñada desde o Auditorio até a praza Maior.
Os primeiros alumnos, de Ensino Infantil e Primario, chegarán ás 10 horas ao Auditorio, onde serán recibidos pola actriz Isabel Risco. Logo da lectura do manifesto a cargo do CPR C. Cisneros, haberá unha actuación do alumnado do CEIP O Couto -interpretarán dúas cantigas, Querémoste Galicia e Galicia, que levarán tamén á 2ª edición do Couto Fest- e unha actuación do grupo de animación A Run Run. Posteriormente, a iso das 11.40 horas, iniciarán un percorrido polas rúas do centro histórico camiño da Praza Maior, onde está organizado un concurso de pancartas e xogos populares, coa colaboración da Asociación Xuvenil Amencer.
A segunda quenda, a de Ensino Secundario, iniciará o camiño inverso a partir das 11:40 horas. Desta vez corresponderalle ao CPR Concepción Arenal a lectura do manifesto, e as actuacións correrán a cargo do IES O Couto -cunha actuación de break-dance a cargo de Mini-Ali-. Pechará o acto o grupo gañador do Cantalingua, Cuarta Xusta.
“Na casa, na escola, bota a lingua fóra!”
O manifesto do Correlingua 2023 demanda o uso da lingua en diferentes ámbitos: desde o familiar ou o curricular, pasando polo da política até o dos medios de comunicación. “Botamos a lingua fóra porque amamos o galego da mesma maneira que amamos todas as linguas e a súa riqueza, porque sabemos que cada lingua importa e non é de mala educación botala fóra para ensinarlla a toda a xente. (…) Por iso berramos: Na casa, na escola, bota a lingua fóra”, reza o manifesto.
A autora do cartel desta edición é a ilustradora coruñesa Xulia Pisón.
