Máis de 60 títulos de 16 países, máis de cen sesións de filmes de animación, comedia, drama, thriller… Na súa vixésima edición o Festival de Cine Internacional de Ourense (OUFF) chega con novidades e apostando por converterse nun “referente do audiovisual de Galicia e do Norte de Portugal”. Así se destacaba na presentación do programa deste certame, que tiña lugar na mañá do 9 de novembro no Centro José Ángel Valente. O primeiro en plantexalo era o alcalde de Ourense, Xesús Vázquez, quen ademais lembraba o inicio deste evento. “Dende os primeiros pasos deste festival en 1995 ata hoxe, teñen pasado por Ourense películas de primeirísimo nivel e o público apreza e valora a oportunidade de ver este cine”. Tamén agradecía o apoio das entidades e empresas colaboradoras e resaltaba que esta é a edición que “conta cun maior apoio por parte da iniciativa privada”.
O rexedor ourensán, que estivo acompañado pola concelleira de Cultura, Belén Iglesias, tamén se refería a tres das novidades desta edición: a descentralización da programación con cine infantil nos barrios da cidade, a creación dun espazo de coprodución entre Galicia e o Norte de Portugal e o feito de contar cun plató de televisión virtual (coa participación da Televisión de Galicia) que se instalará no Centro Ángel Valente durante dous días.
De seguido, tomaba a palabra o presidente da Deputación de Ourense, Manuel Baltar, e incidía en que “entre todos estamos alumeando unha realidade consolidada como é o Festival de Cinema de Ourense, que non só se queda aí, pois é tamén o festival de cinema de Galicia e da Eurorrexión Galicia-Norte de Portugal”. Interviña así mesmo o director da Agadic, Jacobo Sutil, quen subliñaba “o labor de promoción da sétima arte que vén realizando o festival nos seus vinte anos de traxectoria” e aludía á “sinerxia de traballo conxunto entre a Agadic e o OUFF”.
Este acto contaba tamén coa presenza do subdelegado do Goberno en Ourense, Roberto Castro; co director territorial de Abanca, Rubén Saavedra; co delegado de Gas Natural Fenosa en Galicia, Manuel Fernández; co director de programación do OUFF, César Silva, e coa directora do festival, Nora Sola, que foi ademais a condutora da presentación e a encargada de desgranar os principais contidos desta edición do certame.
Nora Sola comezaba dando a coñecer os nomes dos membros do xurado deste XX OUFF (integrado por Frank Feys, Araceli Gonda, Alexandre Powelz, Marta Figueras e María Vázquez) e enumerando as dez longametraxes que competirán polos premios da sección oficial, das que dúas delas serán por vez primeira documentais: “Bridgend”, “The Sinking of Sozopol”, “La vida después”, “Dark Horse”, “La novia”, “Bambanti”, “El comienzo del tiempo”, “La decisión de Julia”, “Techo y comida” e “Killing Time”.
Asemade resaltaba a calidade da película que abrirá o festival, “Lobos sucios” do director coruñés Simón Casal. Esta cinta rescata na súa trama a explotación do wolframio nas minas dos concellos mais orientais da provincia de Ourense, en concreto na comarca de Valdeorras, durante a Guerra Mundial. Está baseada nun documental homónimo do valdeorrés Felipe Rodríguez, que é ademais co-guionista da película.
A directora do OUFF detallaba así mesmo as diferentes seccións desta edición como “Inédito en Ourense”, “Documentais”, “Panorama Galicia”, “Cinemas de Galicia”, “Cine e viño”, “Sesións especiais” e “XX Anos”. Tamén mencionaba as variadas actividades paralelas: o certame “Ouff Escola” (ao que se presentaron 124 traballos de escolares galegos), “Cine por barrios” (con proxeccións na sociedade Albor, de O Couto; o centro cívico de A Cuña e o Espazo Lusquiños), obradoiros infantís, a presentación do DVD de “A Esmorga”, concertos… E, por suposto, anunciaba aos premios do festival, entre eles o Cidade de Ourense, e a película de clausura, “Tercer grado” de Geoffrey Cowper e entre cuxo reparto está a actriz ourensá Sara Casasnovas.
