Na súa aposta polo Corredor Atlántico ferroviario, o Eixo Atlántico do Noroeste Peninsular vén de crear un plan director “propio”, elaborado polo enxeñeiro e exdirector xeral de Mobilidade na Xunta Miguel Rodríguez Bugarín.
Este documento, co título “Elementos para la redacción dun plan director del Corredor Atlántico”, presentábase a finais desta semana nunha rolda de prensa telemática que contaba coa presenza telemática da vicepresidenta do Eixo Atlántico, Lara Méndez, do seu secretario xeral, Xoán Vázquez Mao, e do director de Consello Económico e Social de Galicia, CES (Consello Económico e Social) de Galicia, Agustín Hernandez. Este plan inclúe actuacións previstas por valor de 2.358 millóns de euros, co obxectivo “de que esta rexión deixe de ser un xigante durmido”.
Nesta presentación o secretario do Eixo Atlántico, Xoán Vázquez Mao, sinalaba que levan “meses solicitando ao ministerio o plan director”, pero “ninguén” tivo acceso a el, polo que “non se pode afirmar se existe ou non”, algo no que coincidiu a alcaldesa de Lugo, a socialista Lara Méndez.
De aí a elaboración deste documento. “Na práctica recolle todo o que hai que facer en cada un dos tramos da vertente galega do corredor”, matizaba o responsable do Eixo Atlántico, que incidiu en que “xa non hai escusa” e “ten que haber unha acción institucional conxunta”, posto que o que está “en xogo” é “o futuro” dos portos e da economía xa non só galega, ao seu xuízo, senón o da española no seu conxunto.
Pola súa banda, Lara Méndez sinalaba na súa intervención que “este documento vale como punto de partida para iniciar ese traballo” para o corredor, e valorou “que se inclúa esa liña Lugo-A Coruña-Monforte”.
Manifesto do Eixo Atlántico e do CES Galicia
Co propósito de lograr “unha voz única, e máis despois da pandemia”, o Eixo Atlántico e o CES lanzaban nesta mesma rolda de prensa virtual un manifesto en defensa dunha rede “transeuropea de transportes eficiente, sostible e equilibrada” na Península Ibérica e en apoio do Corredor Atlántico.
O manifesto, que agora buscará adhesións de concellos e de diferentes axentes sociais e económicos, pide ao goberno do Estado que “garanta o equilibrio entre o corredor Mediterráneo e o Atlántico, presentando con carácter inmediato o Plan Director do Corredor Ferroviario do Atlántico, e solicitando nos fondos para a reconstrución o mesmo nivel de investimentos que para o Mediterráneo”.
Por parte do CES, o seu presidente, Agustín Hernández, remarcou que a vontade, tanto do documento presentado como do manifesto non é enfrontarse co corredor Mediterráneo, senón esixir “que existan criterios de igualdade”. Ademais, remarcou a necesidade de que tanto o ministerio como Adif sexan “capaces de executar os orzamentos previstos” en materia ferroviaria.
