Con moi boas sensacións vén de finalizar o V Festival Internacional de Curtas (FIC) Vía XIV de Verín neste 13 de setembro. Con 39 curtas a concurso, homenaxes, actividades paralelas, un estrito protocolo anticovid no Auditorio, sede do certame, que se enchía cada xornada.
“A proba do noso éxito témola en que o público respondeu con responsabilidade á nosa chamada. Tivemos o aforo completo en sesións e actividades da semana, unha evidencia tamén de que o cambio de datas que fixemos foi exitoso”, dicía o seu director, Carlos Montero na gala de clausura do festival, celebrada o 12 de setembro.
Neste acto, presentado por Iria Sobrado, entregábanse os galardóns das catro categorías do certame. Traballos de Bélxica, Canadá, Suecia, España e tamén un feito en Galicia (con selo verinés) integraban o palmáres nesta edición 2020 do certame, que se iniciaba o 5 de setembro.
O Premio á Mellor Curta na Categoría “Outra Mirada” foi para Bos, un traballo dirixido por Steffen Geypens. Jamila, unha curta sueca realizada por Sophie Vukovic, ergueuse co Premio á Mellor Curta na Categoría “Horizontes”. Por outra banda, Eco -do madrileño Aitor de Miguel- levou o Premio á Mellor Curta na Categoría “A Raia” e, finalmente, Je finirais en prison, de Alexandre Dostie, feita en Canadá, foi distinguida co Premio á Mellor Curta na Categoría “Nova”. O Premio do Público foi para Feitizo, unha curta dirixida polos mozos de Verín Álex González e Patricia Porto.
O xurado decidiu tamén outorgar unha mención especial, dentro da categoría A Raia, á curta Néstor, do portugués João González. Ademais entregábase un premio especial en memoria de “Geri”, que recollía emocionado e agradecido o seu pai, o artesán Gerardo Fernández (creador este ano do Premio do Público), que recibía de man de Jorge Godás. Tamén recollía o seu galarón como homenaxeado o actor galego Luis Zahera.
Durante o acto o alcalde de Verín, Gerardo Seoane, daba o seu parabéns á organización, destacando a boa resposta dos espectadores, e o tenente de alcalde, Diego Lourenzo, resaltaba que este “non foi un FIC máis, por iso ten tanto valor, aquí estivemos a pesar das dificultades, con responsabilidade, mantendo as medidas de seguridade, aténdonos os protocolos de saúde a distanciamento, pero tamén con todo o amor á nosa cultura. E, neste senso, teño que agradecer o traballo da Asociación Cutural Via XIV e do equipo do FIC, da organización, dos voluntarios, dos traballadores municipais, e a exemplaridade do público e de todos os veciños de Verín, grazas a todos polo voso compromiso”.
De maneira semellante se pronunciaba o director do festival, Carlos Montero, quen recoñecía as complexidades desta edición, pero tamén indicía en que “non queríamos deternos, porque sabiamos que se o facíamos ía ser moi difícil retomar o FIC e tamén porque cremos firmemente que somos cultura e que esta non debe parar. Ao contrario, demostrouse máis necesaria que nunca en tempos de pandemia pois nos acompañou e fíxonos máis levadeiro o confinamento, por iso decidimos impulsar esta quinta edición. Iso si, marcando un estrito protocolo anti-Covid, con medidas que nos axudaron a todos a sentirnos máis seguros”.
A gala estivo tamén marcada polas actuacións musicais co son de filmes como “A Misión”, entre outras referencias cinematográficas, e abríase coa interpretación da banda sonora do FIC, interpretada tamén polo seu autor, o verinense Jorge Godás.
Fotos: Carlos G. Hervella.